3-noyabr kuni Bishkek shahrida O‘zbekiston va Qirg‘iziston o‘rtasida siyosiy maslahatlashuvlarning navbatdagi davrasi bo‘lib o‘tdi. Bu haqda Tashqi ishlar vazirligi xabar qildi.
Qayd etilishicha, ikki mamlakat tashqi ishlar idoralari rahbarlari Vladimir Norov va Jeenbek Kulubaev O'zbekiston—Qirg‘iziston o‘rtasidagi ikki va ko‘p tomonlama hamkorlikning dolzarb masalalarini muhokama qilgan.
Jumladan, ikki davlat o‘rtasida davlat chegarasini delimitatsiya qilish masalalari bo‘yicha fikr almashilgan.
Tenglik, o‘zaro manfaat va yaxshi qo‘shnichilik tamoyillari asosida davlat chegarasini kesib o‘tish liniyasini huquqiy rasmiylashtirishni yakunlash ikki mamlakat va butun Markaziy Osiyo manfaatlariga javob berishi ta’kidlangan.
Delegatsiyalar o‘zaro savdo hajmini oshirish va uning nomenklaturasini kengaytirish, ikki tomonlama hamkorlik mexanizmlari faoliyatini faollashtirish, biznes sub’ektlari va mintaqalar o‘rtasidagi aloqalarni kengaytirish choralarini ko‘rishga kelishib olgan.
Birgalikda yirik infratuzilma va energetika loyihalarini amalga oshirish, jumladan, “Xitoy—Qirg‘iziston—O‘zbekiston” temiryo‘lini qurish masalalari alohida muhokama qilingan.
Madaniy-gumanitar yo‘nalishda qator qo‘shma tadbirlarni o‘tkazish yuzasidan fikr almashilgan.
Izoh (0)