O‘zbekistonning 14 ta hududida 2023-yildan maktablarning 1-4 sinflarida Finlyandiya ta’lim tajribasi joriy qilinadi

2023-yil 1-yanvardan 14 ta hududdan tanlab olingan maktablarning 1-4 sinflarida Finlyandiya ta’lim tajribasi joriy qilinadi. Bu haqda AOKAda o‘tkazilgan brifingda Xalq ta’limi vazirligi axborot xizmati rahbari Laylo Rustamova ma’lum qildi.

Qayd etilishicha, 2023-yil yanvar oyidan joriy qilinish ko‘zda tutilgan fin ta’limi approbatsiyasida 4 mingdan oshiq o‘quvchi ishtirok etishi kutilmoqda.

Shuningdek, ta’lim tizimiga o‘zgartirish kiritish maqsadida murojaat qilgan 6 mingga yaqin o‘qituvchi-pedagog uchun ham hududlardagi malaka oshirish markazlarida hamda aprobatsiya o‘tadigan maydonchalarda alohida o‘quv-mashg‘ulotlar tashkil etib boriladi.

Tajriba-sinov ishlarining birinchi bosqichi sifatida 139 ta boshlang‘ich sinf o‘qituvchisi uchun 4-9 noyabr kunlari maxsus malaka oshirish kurslari Toshkent shahrida tashkil etiladi.