Farg‘ona viloyatida aholi uchun ajratilgan ko‘mir yoqilg‘isini o‘zlashtirgan shaxslar aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Qayd etilishicha, Bosh prokuratura huzuridagi departamentning Oltiariq tumani bo‘limi tomonidan tergovga qadar tekshiruv o‘tkazilgan. Unda “K.t.” MCHJ Farg‘ona viloyati filiali So‘x ko‘mir ombori mudiri U.A. va boshqalar tumandagi 7 ta MFY uchun ajratilgan ko‘mirni go‘yoki aholiga yetkazib berilgani haqida soxta hujjatlarni rasmiylashtirishib, jami 300,5 tonna ko‘mirni boshqa shaxslarga bozor narxida sotib yuborgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)