AQSH Ukrainadagi nizo muzokaralar yo‘li bilan hal qilinishiga erishmoqchi, deya ma’lum qildi mamlakat Milliy xavfsizlik kengashi strategik kommunikatsiyalar bo‘yicha koordinatori Jon Kirbi.
“Prezident (Jo Bayden)ning maqsadlari boshidanoq yaqqol edi… Biz Rossiya bilan ziddiyatga borishni xohlamaymiz. Bu birinchi o‘rinda”, — dedi u. Shuningdek, Kirbi AQSH Rossiyada hokimiyatni almashtirishga intilmayotganini yana bir marta ma’lum qildi.
Vashington bu haqda avval ham bir necha marta gapirgan, uning siyosati Rossiyaga, “shafqatsiz sanksiyalar yordamida” o‘z harbiy operatsiya haqidagi qarori oqibatlarini his qildirishga hamda Ukrainaga gumanitar yordam berishga qaratilganini ta’kidlagan edi.
Boshqa vazifalar qatorida Kirbi NATOning sharqiy qanotini mustahkamlash va Ukrainaga yordam ko‘rsatib, prezident Vladimir Zelenskiy Rossiya bilan “muzokaralar stolida muvaffaqiyatga erishish uchun zarur bo‘lgan barcha ko‘mak va vositalar”ga ega bo‘lishini ta’minlashni aytib o‘tdi. AQSH Ukraina jang maydonida muvaffaqiyat qozonishi uchun uning o‘zini himoya qilish qobiliyatini qo‘llab-quvvatlashda davom etadi, deb va’da berdi Oq uy vakili.
Bayden ma’muriyati Rossiya bilan qarama-qarshilikka intilmayotgani va Ukrainadagi jangovar harakatlarda qatnashmasligi haqida avval ham ko‘p bora bayonot bergan. Shunga qaramay, Vashington, Moskva yadro qurolidan foydalanishga qaror qilgan taqdirda, uni “halokatli oqibatlar” kutishi haqida ogohlantirgan.
Izoh (0)