KXDR 10 ta ballistik raketa uchirdi, ulardan biri Janubiy Koreya chegarasini kesib o‘tdi

Shimoliy Koreya Yapon dengiziga qarata kamida 10 ta har xil turdagi raketalarni uchirdi. Bu haqda janubiy koreyalik harbiylarga tayanib, Yonhap xabar berdi.

Shtab boshliqlari birlashgan qo‘mitasi ma’lumotlariga ko‘ra, parvozlar Shimoliy Koreyaning Vonsan shahridan amalga oshirilgan. Raketalardan biri Janubiy Koreya bilan dengiz chegarasini kesib o‘tgan, bunday holat 1950—53-yillardagi Koreya urushidan buyon birinchi marta kuzatildi, deya qayd etdi Janubiy Koreya harbiylari.

Snaryad ochiq dengizga, Shimoliy chegara chizig‘idan 26 km janubga, Janubiy Koreyaning Sokchxo shahridan taxminan 57 km sharqqa va Ullindo orolidan 167 km shimoli-g‘arbga kelib tushgan, ushbu orolda havo trevogasi e’lon qilingan. Snaryad Toshkent vaqti bilan 4:51 da aniqlangan. Pxenyan, shuningdek, har xil turdagi yana bir nechta raketalarni g‘arb va sharqqa uchirgan.

Yaponiya Mudofaa vazirligi raketalar tufayli KXDRga norozilik bildirdi. Idora rahbari Yasukadzu Xamada kamida ikkita raketa uchirilgani haqida aytgan, ular 150 va 200 km masofani bosib o‘tgani va ehtimol, noto‘g‘ri trayektoriyalar bo‘yicha parvoz qilganini qayd etgan edi. Uning aytishicha, samolyotlar yoki kemalarga zarar yetmagan.

KXDR ballistik raketalariga javoban, Janubiy Koreya qiruvchilari Shimoliy chegara chizig‘idan shimolda, ochiq dengizga qarata uchta “havo-yer” sinfidagi raketalarni uchirdi.

Janubiy Koreya prezidenti Yun Sok Yol KXDR raketa parvozlarini qoralab, davlat chegarasi buzilganini qayd etdi va “Shimolni provokatsiya badalini to‘lashga majburlash uchun shoshilinch choralar ko‘rishni buyurdi. Bundan tashqari, Milliy xavfsizlik kengashi favqulodda majlisida u harbiylarni Shimoliy Koreya tomonidan yuqori darajali qo‘shimcha provokatsiyalarga tayyor turishga chaqirdi.

KXDR raketalarining uchirilishi Janubiy Koreya va AQSH qariyb besh yil ichida birinchi marta o‘tkazayotgan keng ko‘lamli havo mashg‘ulotlari fonida bo‘lib o‘tdi. Pxenyan avvalroq unga hujum bo‘lgan taqdirda, Seul va Vashington uchun buning to‘lovi “dahshatli” bo‘lishi haqida ogohlantirgandi. KXDR mashg‘ulotlarni bostirib kirishga tayyorgarlik deb hisoblamoqda, Janubiy Koreya va AQSH esa manyovrlar mudofaa xususiyatiga egaligini ta’kidlamoqda.

Bu KXDR tomonidan yil boshidan buyon 28, sentabrdan buyon esa o‘ninchi marta raketa uchirilishidir. Bundan avvalgisi 28-oktabr kuni amalga oshirilgan edi.