Шимолий Корея Япон денгизига қарата камида 10 та ҳар хил турдаги ракеталарни учирди. Бу ҳақда жанубий кореялик ҳарбийларга таяниб, Yonhap хабар берди.
Штаб бошлиқлари бирлашган қўмитаси маълумотларига кўра, парвозлар Шимолий Кореянинг Вонсан шаҳридан амалга оширилган. Ракеталардан бири Жанубий Корея билан денгиз чегарасини кесиб ўтган, бундай ҳолат 1950—53 йиллардаги Корея урушидан буён биринчи марта кузатилди, дея қайд этди Жанубий Корея ҳарбийлари.
Снаряд очиқ денгизга, Шимолий чегара чизиғидан 26 км жанубга, Жанубий Кореянинг Сокчхо шаҳридан тахминан 57 км шарққа ва Уллиндо оролидан 167 км шимоли-ғарбга келиб тушган, ушбу оролда ҳаво тревогаси эълон қилинган. Снаряд Тошкент вақти билан 4:51 да аниқланган. Пхеньян, шунингдек, ҳар хил турдаги яна бир нечта ракеталарни ғарб ва шарққа учирган.
Япония Мудофаа вазирлиги ракеталар туфайли КХДРга норозилик билдирди. Идора раҳбари Ясукадзу Хамада камида иккита ракета учирилгани ҳақида айтган, улар 150 ва 200 км масофани босиб ўтгани ва эҳтимол, нотўғри траекториялар бўйича парвоз қилганини қайд этган эди. Унинг айтишича, самолётлар ёки кемаларга зарар етмаган.
КХДР баллистик ракеталарига жавобан, Жанубий Корея қирувчилари Шимолий чегара чизиғидан шимолда, очиқ денгизга қарата учта «ҳаво-ер» синфидаги ракеталарни учирди.
Жанубий Корея президенти Юн Сок Ёл КХДР ракета парвозларини қоралаб, давлат чегараси бузилганини қайд этди ва «Шимолни провокация бадалини тўлашга мажбурлаш учун шошилинч чоралар кўришни буюрди. Бундан ташқари, Миллий хавфсизлик кенгаши фавқулодда мажлисида у ҳарбийларни Шимолий Корея томонидан юқори даражали қўшимча провокацияларга тайёр туришга чақирди.
КХДР ракеталарининг учирилиши Жанубий Корея ва АҚШ қарийб беш йил ичида биринчи марта ўтказаётган кенг кўламли ҳаво машғулотлари фонида бўлиб ўтди. Пхеньян аввалроқ унга ҳужум бўлган тақдирда, Сеул ва Вашингтон учун бунинг тўлови «даҳшатли» бўлиши ҳақида огоҳлантирганди. КХДР машғулотларни бостириб киришга тайёргарлик деб ҳисобламоқда, Жанубий Корея ва АҚШ эса манёврлар мудофаа хусусиятига эгалигини таъкидламоқда.
Бу КХДР томонидан йил бошидан буён 28, сентябрдан буён эса ўнинчи марта ракета учирилишидир. Бундан аввалгиси 28 октябрь куни амалга оширилган эди.
Мавзуга доир:
Изоҳ (0)