Fransiya prezidenti Emmanuel Makron Ukraina rahbari Vladimir Zelenskiyga Parij Kiyevga havo hujumidan mudofaa tizimini mustahkamlashda yordam berishini ma’lum qildi. Bu haqda Yelisey saroyi saytida ikki davlat rahbarlarining telefon orqali suhbatlari yakunlari bo‘yicha e’lon qilingan xabarda keltirib o‘tilgan.
1-noyabr, seshanba kuni bo‘lib o‘tgan suhbat chog‘ida davlat rahbarlari Ukrainadagi vaziyatni muhokama qildi. Makron, shuningdek, Zelenskiyni Fransiya Kiyevga harbiy yordamni imkon qadar tezroq oshirish uchun barcha resurslarni safarbar qilganiga ishontirdi.
Bundan tashqari, Fransiya prezidenti Ukrainaga kelayotgan qish mavsumiga tayyorgarlik ko‘rishda yordam berishga qaror qilganini bildirdi.
Ikki prezident 13-dekabr kuni Parijda qishda Ukraina fuqarolarining hayoti barqarorligini qo‘llab-quvvatlash maqsadida xalqaro konferensiya tashkil etishga kelishib oldi. Shu maqsadda Ukrainaning boshqa hamkorlari bilan yaqin orada tayyorgarlik ishlari boshlanadi, — deyiladi manbada.
Izoh (0)