Toshkentdagi Central Park bog‘ida 2-noyabr kuni birinchi Workout Fest xalqaro ko‘cha sporti festivali bo‘lib o‘tdi. Bu haqda “Daryo” muxbiri Madina Nurman xabar bermoqda.
Tadbirda Xalqaro vorkaut va kalistenika federatsiyasi asoschisi va prezidenti Maris Slezinsh, sport gimnastikasi bo‘yicha uch karra Bolgariya chempioni Viktor Kamenov, Chexiya va Slovakiyaning strit-vorkaut bo‘yicha ko‘p karra chempioni Dominik Klimek, Yevropa shimoliy mamlakatlari o‘rtasida vorkaut bo‘yicha Yevropa chempioni Edgar Zindoga kabi professional sportchilarni ham uchratish mumkin edi.
Festivalni o‘tkazish uchun professional vorkaut-park qurildi. Ushbu maydoncha birinchi marta inklyuziv muhitga ega bo‘lgan bepul professional vorkaut-hudud sanaladi. Tashkilotchilar uni bog‘ga tashrif buyuruvchilarga hadya sifatida taqdim etdi.
“Vorkaut – sportning nisbatan yangi turi. Biz uni butun dunyo bo‘yicha faol targ‘ib qilmoqdamiz. Va biz bu festivalni o‘zbekistonliklar o‘rtasida vorkautni ommalashtirish maqsadida tashkil etdik va o‘tkazdik.
Ushbu maydoncha professionallar tomonidan vorkaut-zonalarning sifati va xavfsizligiga qo‘yilgan jahon talablarini hisobga olgan holda qurildi. Kelajakda O‘zbekistonda Milliy chempionat va Jahon kubogi bosqichlarini o‘tkazishga umid bog‘lamoqdamiz”, – deydi Xalqaro vorkaut va kalistenik federatsiyasi prezidenti Maris Slezinsh.
Maydonchada o‘rnatilgan sport uskunalari nogironligi bo‘lgan shaxslar uchun ham moslashtirilgan.
Tadbirda ta’kidlanishicha, O‘zbekistonda vorkaut bilan asosan yoshlar shug‘ullanadi, ammo sportning ushbu turi deyarli hammaga, shu jumladan nogironligi bo‘lgan shaxslar uchun ham mos. Vorkaut-hududlarni uy oldi hovlilardagi maydonchalarda jihozlash va istalgan vaqtda bepul shug‘ullanish mumkin. Professional konstruksiyalangan vorkaut-parkda bir vaqtning o‘zida 100 kishi sport bilan shug‘ullanishi mumkin.
Festival mehmonlari jahon yulduzlaridan mahorat-darslari, Workout game to‘siqlari bilan musobaqalar va panna-futbol tomosha qilish imkoniyatiga ega bo‘ldi.
Izoh (0)