Samarqandda Koreya kolleji ochiladi

Samarqand xalqaro texnologiya universiteti qoshida Koreya texnologiya va madaniyat kolleji ochiladi, deb xabar bermoqda “Dunyo” AA.

Qayd etilishicha, Samarqand xalqaro texnologiya universiteti rektori, professor Yusuf Abdullayev Janubiy Koreyaga amalga oshirgan safari doirasida ushbu oliy bilim yurti hamda qator yetakchi ta’lim muassasalari va ilmiy-tadqiqot institutlari, xususan Xanguk xorijiy tillar universiteti, Ipak yo‘li universitetlar tarmog‘i, Osiyo madaniyati va taraqqiyoti instituti, Koreya boshqaruv axborot tizimi jamiyati o‘rtasida hamkorlik to‘g‘risida memorandumlar imzolandi.

Ushbu memorandumlar asosida Samarqand xalqaro texnologiya universitetida texnologik injiniring, “yashil” energetika, axborot-texnologiyalari, koreys tili yo‘nalishlarida Janubiy koreyalik hamkorlar bilan yuqori malakali mutaxassislarni tayyorlash bo‘yicha hamkorlik yo‘lga qo‘yiladi.

Bundan tashqari, Samarqand xalqaro texnologiya universiteti qoshida Koreya texnologiya va madaniyat kollejini (Korean College of Technology and Culture) ochishga kelishib olindi. 2023-yil yanvarda faoliyat boshlaydigan mazkur kollejda “yashil” energetika (qayta tiklanuvchi energiya), axborot-texnologiyalari dasturchilarini tayyorlash, dizayn (sanoat, iqtisodiyot, qurilish dizaynerligi) va koreys tili bo‘yicha mutaxassislar tayyorlanadi.

Osiyo madaniyati va taraqqiyoti instituti ushbu kollejni malakali o‘qituvchilar bilan ta’minlash vazifasini o‘z zimmasiga oladi. Ipak yo‘li universitetlar tarmog‘i direktori Xvang Sung Don esa ushbu kollejga rahbarlik qiladi.