Тошкентдаги Central Park боғида 2 ноябрь куни биринчи Workout Fest халқаро кўча спорти фестивали бўлиб ўтди. Бу ҳақда «Дарё» мухбири Мадина Нурман хабар бермоқда.
Тадбирда Халқаро воркаут ва калистеника федерацияси асосчиси ва президенти Марис Слезинш, спорт гимнастикаси бўйича уч карра Болгария чемпиони Виктор Каменов, Чехия ва Словакиянинг стрит-воркаут бўйича кўп карра чемпиони Доминик Климек, Европа шимолий мамлакатлари ўртасида воркаут бўйича Европа чемпиони Эдгар Зиндога каби профессионал спортчиларни ҳам учратиш мумкин эди.
Фестивальни ўтказиш учун профессионал воркаут-парк қурилди. Ушбу майдонча биринчи марта инклюзив муҳитга эга бўлган бепул профессионал воркаут-ҳудуд саналади. Ташкилотчилар уни боғга ташриф буюрувчиларга ҳадя сифатида тақдим этди.
«Воркаут – спортнинг нисбатан янги тури. Биз уни бутун дунё бўйича фаол тарғиб қилмоқдамиз. Ва биз бу фестивални ўзбекистонликлар ўртасида воркаутни оммалаштириш мақсадида ташкил этдик ва ўтказдик.
Ушбу майдонча профессионаллар томонидан воркаут-зоналарнинг сифати ва хавфсизлигига қўйилган жаҳон талабларини ҳисобга олган ҳолда қурилди. Келажакда Ўзбекистонда Миллий чемпионат ва Жаҳон кубоги босқичларини ўтказишга умид боғламоқдамиз», – дейди Халқаро воркаут ва калистеник федерацияси президенти Марис Слезинш.
Майдончада ўрнатилган спорт ускуналари ногиронлиги бўлган шахслар учун ҳам мослаштирилган.
Тадбирда таъкидланишича, Ўзбекистонда воркаут билан асосан ёшлар шуғулланади, аммо спортнинг ушбу тури деярли ҳаммага, шу жумладан ногиронлиги бўлган шахслар учун ҳам мос. Воркаут-ҳудудларни уй олди ҳовлилардаги майдончаларда жиҳозлаш ва исталган вақтда бепул шуғулланиш мумкин. Профессионал конструкцияланган воркаут-паркда бир вақтнинг ўзида 100 киши спорт билан шуғулланиши мумкин.
Фестиваль меҳмонлари жаҳон юлдузларидан маҳорат-дарслари, Workout game тўсиқлари билан мусобақалар ва панна-футбол томоша қилиш имкониятига эга бўлди.
Изоҳ (0)