Ukraina Mudofaa vazirligi Razvedka bosh boshqarmasi boshlig‘i Kirill Budanovning Rossiya prezidenti Vladimir Putin o‘z qiyofadoshlaridan foydalanishi haqidagi gaplari “safsata”dir. Bu haqda Rossiya prezidenti matbuot kotibi Dmitriy Peskov ma’lum qildi, deb yozadi “RBK”.
Avvalroq Budanov Daily Mail gazetasiga bergan intervyusida Putin, go‘yoki, kamida uch nafar qiyofadoshidan foydalanishini, ular Rossiya prezidentiga o‘xshash uchun plastik operatsiya qildirganini aytgandi. Uning so‘zlariga ko‘ra, “ularni oshkor qiladigan yagona narsa — ularning bo‘yi, imo-ishoralari, tana harakatlari va quloqlari”.
“Buni qanday izohlash mumkin? Safsata deb!” — dedi Peskov.
Putinga uning qiyofadoshlari bor-yo‘qligi haqida ko‘p marta savol berilgan. 2000-yilda “TASS”ga bergan intervyusida o‘sha vaqtda Federal qo‘riqlov xizmatiga rahbarlik qilgan Yevgeniy Murov Putinning qiyofadoshlari yo‘qligini aytib, bu ma’lumotni “mif va safsata” deb atagandi.
2001-yilda undan bu haqda Kostroma viloyati fuqarosi bo‘lgan bir ayol so‘ragan. U prezident doim boshqa mamlakatlar yetakchilari bilan muloqotda bo‘lishi, “doim omma qarshisida bo‘lishi, har kuni parvoz qilishi”ni ta’kidlagan. “Balki, sizning qiyofadoshingiz bordir, agar bo‘lmasa, unda siz qachon dam olasiz?” — deb savol bergandi u. Bunga javoban Putin qiyofadoshi yo‘qligini aytgan. “Bularning hammasi ertak”, — deya ishontirgan u.
2015-yilda esa bir jurnalist Putinga unga o‘xshash bo‘lgan odamning suratini ko‘rsatib, savol berganida: “Qiyofadoshlarim yo‘q. Ular menga nimaga kerak?” — degan edi.
Keyinroq, 2020-yilda Rossiya rahbari “TASS”ga bergan intervyusida 2000-yillar boshida, “terrorizmga qarshi kurash bo‘yicha eng og‘ir davrlarda”, unga o‘z qiyofadoshini jalb qilish haqida takliflar tushganini tan olgandi. Xususan, prezident uchun xavfsiz bo‘lmagan tadbirlarga o‘zi bormasdan, qiyofadoshini yuborish taklif etilgan. Putinning so‘zlariga ko‘ra, u bunday tashabbusni rad etgan.
Izoh (0)