Rossiya tomonidan Ukraina shaharlarining o‘qqa tutilishidan so‘ng 12 ta davlat Ukraina infratuzilmasini tiklashga yordam bermoqda. Bu haqda mamlakat tashqi ishlar vaziri Dmitriy Kulebaga tayanib, “Ukraina seychas” xabar berdi.
“Biz hozirga qadar 12 davlat: Isroil, Ispaniya, Italiya, Litva, Germaniya, Shimoliy Makedoniya, Polsha, Koreya respublikasi, Slovakiya, Sloveniya, Finlyandiya va Fransiya hukumatlari va kompaniyalari bilan uskunalar yetkazib berish bo‘yicha kelishib oldik. Hamkorlar doirasini va qo‘llab-quvvatlash hajmini oshirish ustida ishlashni davom ettiramiz”, — dedi Dmitriy Kuleba.
Uning qo‘shimcha qilishicha, ushbu mamlakatlar hukumatlari va kompaniyalari Ukraina infratuzilmasini tiklash uchun zarur jihozlarni yetkazib bermoqda, ularning bir qismi allaqachon keltirilgan, qolganlari esa yaqin kunlarda yetkaziladi.
Rossiya Ukraina infratuzilmasiga 10-oktabrdan buyon zarbalar bermoqda. Bunday zarbalar Qrim ko‘prigidagi portlashdan keyin boshlangan, portlashni esa, Rossiya hukumati fikricha, Ukraina maxsus xizmatlari uyushtirgan. Rossiya Mudofaa vazirligi zarbalar nishoni harbiy boshqaruv tizimi, aloqa va energetika obyektlari ekanini aytdi.
Ukraina energetika infratuzilmasining qariyb 40 foiziga zarar yetdi, degandi mamlakat energetika vaziri maslahatchisi Aleksandr Xarchenko. Kiyevda noma’lum muddatga elektr tokini shoshilinch o‘chirish joriy qilindi. Shahar hukumati “to‘liq blekaut” yuz berishi, eng yomon holatda esa issiqlik ta’minoti o‘chishini istisno qilmayapti.
31-oktabr kuni ertalab ham Ukraina shaharlarida, xususan Kiyevda ketma-ket portlashlar sodir bo‘ldi va butun mamlakat hududida havo trevogasi e’lon qilindi. Muhim infratuzilma obyektlariga zarbalar berilgan.
Izoh (0)