Janubiy Koreya va AQSHning muntazam harbiy mashg‘ulotlari fonida Shimoliy Koreya Tashqi ishlar vazirligi Vashingtonni KXDRga qarshi yadro urushiga tayyorgarlik ko‘rayotganlikda va Koreya yarimorolidagi vaziyatni atay keskinlashtirishda aybladi. Bu haqda Shimoliy Koreya markaziy telegraf agentligiga tayanib, “RIA Novosti” xabar berdi.
“AQSH va Janubiy Koreyaning bemulohaza harbiy harakatlari tufayli Koreya yarim oroli va uning atrofidagi vaziyat yana qarama-qarshilikning jiddiy bosqichiga kirdi”, — deya ta’kidladi KXDR Tashqi ishlar vazirligi vakili.
Shimoliy Koreya TIVning ismi oshkor etilmagan vakiliga ko‘ra, dunyoning hech qaysi joyida vaqti, ko‘lami, mazmuni va intensivligi jihatidan AQSH va ittifoqchilarining qo‘shma harbiy mashqlar kabi “ochiqdan ochiq agressiv” bo‘lgan harbiy mashg‘ulotlar o‘tkazilmaydi.
Pxenyan AQSHning KXDRga nisbatan Koreya yarim orolidagi vaziyatni keskinlashtirish bo‘yicha ayblovlarini “be’mani” deb hisoblamoqda. “Agar AQSH baribir jiddiy harbiy provokatsiyaga qo‘l ursa, biz yanada jiddiyroq javob choralarini ko‘rib chiqamiz”, — deya so‘zini yakunladi Shimoliy Koreya TIV vakili.
Avvalroq AQSH va Janubiy Koreya qariyb besh yil ichida birinchi keng ko‘lamli qo‘shma Vigilant Storm havo mashg‘ulotlarini boshlagan edi. Unda 240 dan ortiq samolyot, shu jumladan, ilg‘or “ko‘rinmas samolyotlar”, xususan, F-35A “ko‘rinmas qiruvchilar” ishtirok etmoqda.
Ushbu mashg‘ulotlar Shimoliy Koreya tomonidan bir qator raketalar uchirilganidan so‘ng, qolaversa, Pxenyan yaqin orada yadroviy sinov o‘tkazishi mumkinligi haqidagi xavotirlar fonida amalga oshirilmoqda.
25-oktabr kuni Janubiy Koreya prezidenti Yun Sok Yol Shimoliy Koreya yadroviy sinovlarga tayyorgarlikni yakunlaganini ma’lum qildi. Uning fikricha, Pxenyanda so‘nggi besh yil ichida birinchi marta yadroviy qurilma portlashi muqarrar. AQSH, Janubiy Koreya va Yaponiya Shimoliy Koreyaga yadro sinovi uchun jazo va’da qildi va bu BMT Xavfsizlik Kengashi rezolyutsiyalarini buzishini ta’kidladi.
Izoh (0)