Украина Мудофаа вазирлиги Разведка бош бошқармаси бошлиғи Кирилл Будановнинг Россия президенти Владимир Путин ўз қиёфадошларидан фойдаланиши ҳақидаги гаплари «сафсата»дир. Бу ҳақда Россия президенти матбуот котиби Дмитрий Песков маълум қилди, деб ёзади «РБК».
Аввалроқ Буданов Daily Mail газетасига берган интервьюсида Путин, гўёки, камида уч нафар қиёфадошидан фойдаланишини, улар Россия президентига ўхшаш учун пластик операция қилдирганини айтганди. Унинг сўзларига кўра, «уларни ошкор қиладиган ягона нарса — уларнинг бўйи, имо-ишоралари, тана ҳаракатлари ва қулоқлари».
«Буни қандай изоҳлаш мумкин? Сафсата деб!» — деди Песков.
Путинга унинг қиёфадошлари бор-йўқлиги ҳақида кўп марта савол берилган. 2000 йилда «ТАСС»га берган интервьюсида ўша вақтда Федерал қўриқлов хизматига раҳбарлик қилган Евгений Муров Путиннинг қиёфадошлари йўқлигини айтиб, бу маълумотни «миф ва сафсата» деб атаганди.
2001 йилда ундан бу ҳақда Кострома вилояти фуқароси бўлган бир аёл сўраган. У президент доим бошқа мамлакатлар етакчилари билан мулоқотда бўлиши, «доим омма қаршисида бўлиши, ҳар куни парвоз қилиши»ни таъкидлаган. «Балки, сизнинг қиёфадошингиз бордир, агар бўлмаса, унда сиз қачон дам оласиз?» — деб савол берганди у. Бунга жавобан Путин қиёфадоши йўқлигини айтган. «Буларнинг ҳаммаси эртак», — дея ишонтирган у.
2015 йилда эса бир журналист Путинга унга ўхшаш бўлган одамнинг суратини кўрсатиб, савол берганида: «Қиёфадошларим йўқ. Улар менга нимага керак?» — деган эди.
Кейинроқ, 2020 йилда Россия раҳбари «ТАСС»га берган интервьюсида 2000 йиллар бошида, «терроризмга қарши кураш бўйича энг оғир даврларда», унга ўз қиёфадошини жалб қилиш ҳақида таклифлар тушганини тан олганди. Хусусан, президент учун хавфсиз бўлмаган тадбирларга ўзи бормасдан, қиёфадошини юбориш таклиф этилган. Путиннинг сўзларига кўра, у бундай ташаббусни рад этган.
Изоҳ (0)