Biznesmen Oleg Tinkov Rossiya pasportidan voz kechishi haqida ijtimoiy tarmoqlar orqali ma’lum qildi, deb yozadi “RBK”. Tinkov Rossiya fuqaroligidan chiqishi haqidagi ingliz tilidagi hujjatni Instagram’ga joyladi. Hujjatda 26-oktabr sanasi ko‘rsatilgan.
O‘z xatti-harakatini u urushga qarshi ekanligi bilan izohladi. “Bunday pasportim bo‘lishidan uyalaman”, — deb yozdi u.
Tinkovning so‘zlariga ko‘ra, u Rossiyaga aloqador bo‘lishni boshqa xohlamaydi. U boshqa biznesmenlarni ham “Putin rejimini va uning iqtisodiyotini zaiflashtirish” maqsadida undan o‘rnak olishga chaqirdi. Shu bilan birga, biznesmen, Putinga qarshi chiqayotgan bo‘lsa-da, Ukrainadagi jangovar harakatlarga qarshi bo‘lgan rossiyaliklarning barchasiga o‘z muhabbatini izhor qildi.
“Menda Rossiyaga nisbatan vatanparvarlik tuyg‘usini siznikidan kuchliroq. Chunki siz vaysaysiz, men esa buni amalda ko‘rsataman. Men — Rossiya qahramoniman”, — deya qo‘shib qo‘ydi u “soxta vatanparvarlar”ga javoban.
Tinkov ko‘p marta Ukrainadagi nizoga qarshi chiqqan. 28-fevral kuni, jangovar harakatlar boshlanganidan keyin to‘rt kun o‘tib, Tinkov ijtimoiy tarmoqlarga shunday deb yozgandi: “Davlat pulni odamlarni davolashga, saraton ustidan g‘alaba qozonish uchun tadqiqotlar o‘tkazishga sarflashi kerak, urushga emas”.
19-aprel kuni Tinkov yana Ukrainadagi harbiy nizoga qarshi chiqish qildi, shundan keyin uning Tinkoff Bankni boshqaruvchi TCS Group’dagi ulushini sotish niyati haqida ma’lum bo‘ldi. Oldi-sotdi 28-aprel kuni bo‘lib o‘tdi: Vladimir Potaninning “Interros” kompaniyasi TCS Group’ning Tinkovlar oilasiga tegishli 35 foiz aksiyalarini sotib olganini ma’lum qildi.
“Maxsus operatsiyalar” boshlanib, Rossiya kompaniyalari kotirovkalari keskin tushib ketgach, Tinkov Forbes talqini bo‘yicha milliarder maqomidan ayrilgan. Bankdagi ulushini sotgach, u “Rossiyada hech narsasi qolmagani”ni ma’lum qilgan.
Yana qaysi biznesmenlar Rossiya fuqaroligidan voz kechgan?
31-oktabr kuni Revolut bank servisiga asos solgan biznesmen Nikolay Storonskiy Rossiya fuqaroligidan voz kechgani xabar berilgandi. The Telegraph yozishicha, Revolut vakillari Storonskiyning RF fuqaroligidan voz kechishi Ukrainadagi urush bilan bog‘liqligini bildirgan holda, biznesmen “qat’iyan jangovar harakatlarni zudlik bilan to‘xtatishga chaqirishi”ni ta’kidlagan.Avvalroq tadbirkor va investor, DST Global investitsiyaviy fondi egasi milliarder Yuriy Milner Rossiya fuqaroligidan voz kechgani ma’lum bo‘lgandi.
Sentabr boshida rossiyalik va armanistonlik tadbirkor va investor Ruben Vardanyan Rossiya fuqaroligidan voz kechib, tan olinmagan Tog‘li Qorabog‘ Respublikasiga ko‘chib o‘tganini ma’lum qilgandi.
Shuningdek, iyun oyida Freedom Finance sarmoya kompaniyasi asoschisi Timur Turlov Rossiya fuqaroligidan voz kechib, Qozog‘iston pasportini olganini ma’lum qilgandi.
2022-yil aprelida Rossiyaga aloqador bo‘lgan bir qator tadbirkorlar Forbes jurnaliga murojaat qilib, ularni “rossiyalik biznesmenlar” deb atamaslikni so‘ragan. Ular orasida Nikolay Storonskiy va Yuriy Milner ham bo‘lgan.
Izoh (0)