2022-yil yanvar—sentabr oylarida O‘zbekistondagi o‘rtacha oylik ish haqi 3,72 mln so‘mni tashkil etib, 2021-yilning mos davriga nisbatan 24,9 foizga o‘sdi. Bu haqda Davlat statistika qo‘mitasi xabar berdi.
O‘rtacha oylik ish haqini hisoblashda 3 mln nafar xodimning ma‘lumotlaridan foydalanilgan.
Ma’lum bo‘lishicha, yanvar—sentabr oylarida hududlar kesimida eng yuqori o‘rtacha maosh Toshkent shahriga to‘g‘ri keladi — 5,96 mln so‘m. Toshkent o‘tgan chorakda ham birinchi o‘rinda qayd etilgan edi.
Ko‘plab sanoat zonalari joylashgan Navoiy viloyati 4,95 mln so‘mlik ko‘rsatkich bilan ikkinchi o‘rinni egallagan. Toshkent viloyati esa bu davrda uchinchi pog‘onada qolgan — 3,8 mln so‘m.
Yil boshidan beri eng kam oylik ish haqi 2,73 mln so‘mlik maosh bilan Samarqand viloyatida qayd etilgan. Shuningdek, Farg‘ona (2,78 mln so‘m) va Namangan viloyatlarida (2,8 mln so‘m) ham oylik maosh qolgan hududlarga qaraganda nisbatan pastroq bo‘lmoqda.
O‘zbekistonda mehnatga haq to‘lashning eng kam miqdoriga 2022-yil 1-iyundan o‘zgartirish kiritilgan hamda 920 ming so‘mga yetkazilgan.
Izoh (0)