O‘zbekistonda sentabr oyidagi tovar-xomashyo birjasining faollik darajasi tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
2022-yilning sentabr oyida ishbilarmonlik faolligi indeksining birja komponenti 1,0866 birlikni tashkil etdi.
Bu esa, ushbu komponentning o‘tgan yilning shu davriga nisbatan 8,7 foizga oshganligini anglatib, bitimlar sonining 30,6 foizga ko‘payganligi bilan izohlanadi.
Shu bilan birga har bir bitim bo‘yicha sotib olingan tovarlar o‘rtacha hajmi 13,3 foizga kamaygan.
Mamlakat tovar-xomashyo birjasida tovarlar savdosi umumiy aylanmasi hajmi 2022-yil sentabr oyida 6,57 trln so‘mni tashkil etib, ushbu ko‘rsatkich o‘tgan yilning shu davriga nisbatan 17,9 foizga oshgan.
Shuningdek, o‘tgan hafta davomida, ya’ni 17—23-oktabr kunlari O‘zbekiston tovar-xom ashyo birjasining savdo platformalarida 2,67 trln so‘mlik tovarlar sotilgan bo‘lib, bu avvalgi haftaga nisbatan 8,9 foizga pastdir.
Bunda sotuvlarning 72,9 foizi — birja savdolari; 1,6 foizi — ko‘rgazma-yarmarka savdolari; 25,3 foizi — elektron davlat xaridlari va 0,2 foizi — avtoraqamlarning onlayn-auksioniga to‘g‘ri keldi.
Kichik biznes va xususiy tadbirkorlik subyektlari ishtirokida tuzilgan bitimlarning umumiy hajmi 520,9 mlrd so‘mni tashkil qildi.
Davlat xaridlari tizimlarida o‘tkazilgan elektron savdolar natijasida budjet va korporativ buyurtmachilarining qariyb 147,3 mlrd so‘mlik mablag‘lari tejaldi.
Ko‘rib chiqilayotgan davr mobaynida onlayn auksion orqali 2 015 ta avtoraqamlar sotildi, sotilgan davlat raqam belgilarining umumiy summasi 6,2 mlrd so‘mni tashkil qildi.
Izoh (0)