Armaniston bosh vaziri Nikol Pashinyan Rossiya tinchlikparvar kuchlarining Qorabog‘da qolish muddatini uzaytirish haqidagi hujjatni imzolashga tayyorligini ma’lum qildi, deb yozadi “Kommersant”. Uning so‘zlariga ko‘ra, tinchlikparvarlar 10 yildan 20 yilgacha bo‘lgan muddatga qolishi mumkin. Bu haqda u o‘zi yetakchilik qiluvchi “Fuqarolik kelishuvi” partiyasi qurultoyida aytib o‘tdi.
“Men Sochida tegishli hujjatni imzolab, Rossiya tinchlikparvarlarining Tog‘li Qorabog‘dagi ishtiroki 10, 15, 20 yilga uzaytirilishini qabul qilishga tayyorman”, — dedi Pashinyan. Shu bilan birga, u “Rossiya o‘rniga qaror bera olmasligini aytdi”. Uning tashabbusi 31-oktabr kuni Sochida Rossiya prezidenti Vladimir Putin va Ozarbayjon prezidenti Ilhom Aliyev bilan uch tomonlama uchrashuvda muhokama qilinishi kutilmoqda.
Kreml, rossiyalik tinchlikparvarlar mandatini uzaytirish imkoniyatini izohlar ekan, uchrashuvgacha kutib turishni taklif qildi. “Uchrashuvning o‘zigacha sabr qilaylik”, — dedi Rossiya prezidenti matbuot kotibi Dmitriy Peskov.
Pashinyan Ozarbayjon bilan vaziyatni tartibga solish ustida Rossiya tomonidan taklif etilgan tamoyillar bo‘yicha ishlashga tayyorligini aytgan.
Avvalroq Putin Rossiyaning pozitsiyasini ochiqlagandi. Unga ko‘ra, Armaniston va Ozarbayjon tinchlik shartnomasiga muhtoj, biroq Moskva Yerevanga bosim qilmaydi va uning har qanday tanlovini qo‘llab-quvvatlaydi. Putinning aytishicha, u Armanistonga Qorabog‘dagi beshta tumanni Ozarbayjonga berishni taklif qilgan, biroq Armaniston hukumati bunga rozi bo‘lmagan.
Sentabr oyida Armaniston va Ozarbayjon chegarasida vaziyat keskinlashgan edi. Armaniston bosh vaziri Nikol Pashinyan 31-oktabr kuni Sochida Rossiya prezidenti va Ozarbayjon prezidenti Ilhom Aliyev bilan uchrashishi kutilmoqda. Pashinyan va Aliyev o‘rtasidagi so‘nggi uchrashuv 6-oktabr kuni Pragada bo‘lib o‘tgan. Shundan so‘ng Ozarbayjon prezidenti tinchlik shartnomasi yil oxirigacha imzolanishi mumkinligini aytgan. Armaniston Xavfsizlik Kengashi ham xuddi shunday bayonot bilan chiqqan. Shu bilan birga, oktabr oyida tomonlar muntazam ravishda bir-birini chegarada o‘t ochishda aybladi.
Izoh (0)