Арманистон бош вазири Никол Пашинян Россия тинчликпарвар кучларининг Қорабоғда қолиш муддатини узайтириш ҳақидаги ҳужжатни имзолашга тайёрлигини маълум қилди, деб ёзади «Коммерсантъ». Унинг сўзларига кўра, тинчликпарварлар 10 йилдан 20 йилгача бўлган муддатга қолиши мумкин. Бу ҳақда у ўзи етакчилик қилувчи «Фуқаролик келишуви» партияси қурултойида айтиб ўтди.
«Мен Сочида тегишли ҳужжатни имзолаб, Россия тинчликпарварларининг Тоғли Қорабоғдаги иштироки 10, 15, 20 йилга узайтирилишини қабул қилишга тайёрман», — деди Пашинян. Шу билан бирга, у «Россия ўрнига қарор бера олмаслигини айтди». Унинг ташаббуси 31 октябрь куни Сочида Россия президенти Владимир Путин ва Озарбайжон президенти Илҳом Алиев билан уч томонлама учрашувда муҳокама қилиниши кутилмоқда.
Кремль, россиялик тинчликпарварлар мандатини узайтириш имкониятини изоҳлар экан, учрашувгача кутиб туришни таклиф қилди. «Учрашувнинг ўзигача сабр қилайлик», — деди Россия президенти матбуот котиби Дмитрий Песков.
Пашинян Озарбайжон билан вазиятни тартибга солиш устида Россия томонидан таклиф этилган тамойиллар бўйича ишлашга тайёрлигини айтган.
Аввалроқ Путин Россиянинг позициясини очиқлаганди. Унга кўра, Арманистон ва Озарбайжон тинчлик шартномасига муҳтож, бироқ Москва Ереванга босим қилмайди ва унинг ҳар қандай танловини қўллаб-қувватлайди. Путиннинг айтишича, у Арманистонга Қорабоғдаги бешта туманни Озарбайжонга беришни таклиф қилган, бироқ Арманистон ҳукумати бунга рози бўлмаган.
Сентябрь ойида Арманистон ва Озарбайжон чегарасида вазият кескинлашган эди. Арманистон бош вазири Никол Пашинян 31 октябрь куни Сочида Россия президенти ва Озарбайжон президенти Илҳом Алиев билан учрашиши кутилмоқда. Пашинян ва Алиев ўртасидаги сўнгги учрашув 6 октябрь куни Прагада бўлиб ўтган. Шундан сўнг Озарбайжон президенти тинчлик шартномаси йил охиригача имзоланиши мумкинлигини айтган. Арманистон Хавфсизлик Кенгаши ҳам худди шундай баёнот билан чиққан. Шу билан бирга, октябрь ойида томонлар мунтазам равишда бир-бирини чегарада ўт очишда айблади.
Изоҳ (0)