G‘arb maxsus xizmatlari Rossiya Harbiy-dengiz kuchlari radioxabarini tutib olgan, unda Germaniyaga yadro zarbasi berish ssenariysi muhokama qilingan. Bu 2021-yil oxirida rossiyaliklar tomonidan Boltiq dengizida harbiy mashqlar o‘tkazilayotgan paytda yuz bergan. Bu haqda Germaniyaning Spiegel nashri xabar qilmoqda.
Yashirincha tinglangan xabarda Germaniya bo‘ylab yadro zarbalari haqida gap borgan va uchta nishon ko‘rsatib o‘tilgan, bular — Berlin, AQSHning Ramshtayndagi aviabazasi va Amerika armiyasi yadro qurolini saqlaydigan Byuxel aviabazasi.
Xavfsizlik bo‘yicha mutaxassislar ushbu ma’lumot bo‘yicha ikki xil izoh bermoqda. Ularning bir qismi yadro qurolidan foydalanish harbiy mashg‘ulotlar chog‘ida muhokama qilingan va mashq qilinganiga ishonchi komil bo‘lsa, qolganlar rossiyaliklar ularning xabarlari tinglanayotganini bilgan, shu sababli, G‘arbni qo‘rqitish maqsadida ataylab nishonlarni aytgan, degan fikrda.
Civey tomonidan Spiegel uchun o‘tkazilgan so‘rov natijalariga ko‘ra, germaniyaliklarning 51 foizi yadro urushi boshlanishi ehtimolidan xavotirda, 57 foizi Rossiyaning Ukrainaga, 37 foizi esa Germaniyaga yadro zarbasi berishidan xavfsiramoqda.
Rossiya tomonidan yadroviy zarba xavfi maksimal darajaga yetdi
Avvalroq Rossiya tomonidan yadroviy zarba xavfi 24-fevraldan buyon eng yuqori darajaga yetgani ma’lum qilingandi. AQSH Markaziy razvedka boshqarmasi (MRB) direktori Uilyam Byorns oktabr boshida Ukrainaga kelib, prezident Vladimir Zelenskiy va bir qator ukrainalik mansabdorlar bilan uchrashgan.CNN qayd etishicha, safar Rossiya Ukrainada yadro quroli qo‘llashi mumkinligi borasidagi xavotirlar fonida amalga oshgan. Byorns va AQSH hukumatining boshqa vakillari Moskvaning bunday qadamga tayyorlanayotgani bo‘yicha dalillarni ko‘rmayotganini aytgan bo‘lsa-da, razvedka ma’lumotlaridan xabardor bo‘lgan manbalar voqealarning bunday tus olishi “xavfi yuqori” ekani haqida ogohlantirmoqda. “Rossiya tomonidan yadroviy zarba xavfi u Ukrainaga bostirib kirganidan buyon, ehtimol, eng yuqori darajaga yetdi”, — dedi ular.
Rossiya tomoni hech kimga yadro qurolidan foydalanish bilan tahdid qilmayotganini ko‘p bora ta’kidlagan. Politico ma’lumotlariga ko‘ra, G‘arb 21-sentabrdan keyin Rossiyaning yadroviy qurol-yarog‘lari ustidan kuzatuvni kuchaytirgan. O‘sha kuni qisman safarbarlik haqida e’lon qilayotib, prezident Vladimir Putin G‘arb “yadroviy shantaj”dan foydalanayotganini aytgan va Rossiyani himoya qilish uchun “barcha vositalar”ni ishga solishi haqida ogohlantirgandi.
Rossiya hukumati 23-oktabrdan buyon Ukraina “iflos bomba”dan foydalanib provokatsiyalar uyushtirishga va keyin bunda Rossiyani ayblashga tayyorlanayotganini da’vo qilmoqda.
Izoh (0)