Yahoo! tomonidan YouGov tadqiqot tashkiloti bilan hamkorlikda o‘tkazilgan so‘rovnomaga ko‘ra, amerikaliklarning 57 foizi AQSHning amaldagi prezidenti Jo Bayden va sobiq davlat rahbari Donald Trampning 2024-yilda prezidentlikka qayta saylanishini istamaydi.
Ma’lumotlarga ko‘ra, respondentlarning 57 foizi “Bayden 2024-yilda yana prezidentlikka nomzod bo‘lishi kerakmi?” degan savolga salbiy javob bergan. Shu bilan birga, ularning 21 foizi Bayden qayta saylanishi kerakmi yoki yo‘qmi, bu haqda aniq bilmasligini aytgan bo‘lsa, 22 foizi uning qayta saylanishini qo‘llab-quvvatlagan.
Xuddi shunday holat Tramp bilan ham kuzatilgan. So‘rovnoma ishtirokchilarining 57 foizi Tramp prezidentlik poygasida qatnashmasligi kerak, deb hisoblaydi, ammo respondentlarning 29 foizi uning nomzodini qo‘llab-quvvatlagan va faqat 14 foizi savolga ishonch bilan javob bera olmasligini bildirgan.
Ma’lumot uchun, so‘rovnoma 13—17-oktabr kunlari o‘tkazildi. Unda 1629 nafar amerikalik ishtirok etdi.
Izoh (0)