Shavkat Mirziyoyev va Yevropa kengashi prezidenti Sharl Mishel uchrashuv o‘tkazgandi. Prezident matbuot xizmati ularning matbuot uchun qo‘shma bayonotini e’lon qildi.
Unda qayd etilishicha, O‘zbekiston va Yevropa Ittifoqi o‘rtasidagi munosabatlarga yangi sur’at bag‘ishlash va ularni yanada chuqurlashtirish maqsadida birgalikdagi sa’y-harakatlarni amalga oshirishga kelishib olindi.
Ikki tomonlama va hududlararo hamkorlik uchun yaratilgan qo‘shma mexanizmlar sermahsul ishlayotgani ijobiy baholandi. Ularning salohiyati va imkoniyatlaridan foydalanish samaradorligini yanada oshirish maqsadida birgalikda harakat qilishga tayyorlik bildirildi.
Tomonlar O‘zbekiston va Yevroittifoq o‘rtasidagi munosabatlarda yangi sahifa ochadigan, siyosat, iqtisodiyot, xavfsizlik va inson kapitali yo‘nalishlaridagi masalalarning keng doirasi bo‘yicha hamkorlikni mustahkamlashga xizmat qiladigan Kengaytirilgan sheriklik va hamkorlik to‘g‘risidagi bitim dastlabki bosqichda imzolanganini olqishladi.
Prezidentlar ushbu muhim hujjat imkon qadar tez fursatda imzolanishi va ratifikatsiya qilinishiga umid bildirdi.
Yevropa Ittifoqi kompaniyalaridan O‘zbekistonga to‘g‘ridan-to‘g‘ri investitsiyalar, eng yangi texnologiyalar, ilg‘or tajriba va yuksak standartlarni jalb qilish masalalariga alohida e’tibor qaratildi. O‘zbekiston tomoni xorijiy, shu jumladan Yevropa Ittifoqi kompaniyalarining to‘g‘ridan-to‘g‘ri investitsiyalarini jalb qilish uchun zarur sharoitlar yaratishga tayyorligini bildirdi.
Barqaror transport yo‘laklarini yaratish, shu jumladan Transkaspiy multimodal marshrutini rivojlantirish o‘zaro savdoni ko‘paytirish uchun tizimli omil sifatida belgilandi. Prezidentlar portlarning quvvatlarini kengaytirish, parom va temir yo‘l parklarini kengaytirish, bojxona tartib-taomillarini uyg‘unlashtirish, yuklar bilan ishlash va chegaralardan o‘tish uchun raqamli yechimlarni joriy qilish muhimligini qayd etdi.
Tomonlar O‘zbekiston uchun 2021—2027-yillarga mo‘ljallangan YIning moliyaviy-texnik ko‘magiga doir ko‘p yillik indikativ dasturi tasdiqlangani va amalga oshirilishi boshlanganini olqishladi.
Ular raqamlashtirish, “yashil” iqtisodiyot, energetik samaradorlik va suvdan foydalanish sohalarida o‘zaro manfaatli hamkorlik uchun mavjud salmoqli salohiyatdan foydalanish, shu jumladan Yevropaning ilg‘or tajribasini joriy qilish va ushbu sohalarda qo‘shma loyihalarni amalga oshirish muhimligini qayd etdi.
Ta’lim va fan sohasidagi hamkorlikni, shu jumladan Erasmus+ va Horizon Europe dasturlari salohiyatidan foydalangan holda chuqurlashtirish muhim ekani ta’kidlandi. Tomonlar kasbiy ta’lim bo‘yicha “DARYA” birinchi mintaqaviy loyihaning amalga oshirilishini olqishladi.
O‘zbekiston tomoni 2023-yilda O‘zbekistonda “Yevropa Ittifoqi—Markaziy Osiyo” birinchi turizm forumini o‘tkazishni taklif qildi.
Mintaqaviy va xalqaro kun tartibining dolzarb masalalari ham muhokama qilingan.
Mavzuga doir:
Izoh (0)