Шавкат Мирзиёев ва Европа кенгаши президенти Шарл Мишел учрашув ўтказганди. Президент матбуот хизмати уларнинг матбуот учун қўшма баёнотини эълон қилди.
Унда қайд этилишича, Ўзбекистон ва Европа Иттифоқи ўртасидаги муносабатларга янги суръат бағишлаш ва уларни янада чуқурлаштириш мақсадида биргаликдаги саъй-ҳаракатларни амалга оширишга келишиб олинди.
Икки томонлама ва ҳудудлараро ҳамкорлик учун яратилган қўшма механизмлар сермаҳсул ишлаётгани ижобий баҳоланди. Уларнинг салоҳияти ва имкониятларидан фойдаланиш самарадорлигини янада ошириш мақсадида биргаликда ҳаракат қилишга тайёрлик билдирилди.
Томонлар Ўзбекистон ва Евроиттифоқ ўртасидаги муносабатларда янги саҳифа очадиган, сиёсат, иқтисодиёт, хавфсизлик ва инсон капитали йўналишларидаги масалаларнинг кенг доираси бўйича ҳамкорликни мустаҳкамлашга хизмат қиладиган Кенгайтирилган шериклик ва ҳамкорлик тўғрисидаги битим дастлабки босқичда имзоланганини олқишлади.
Президентлар ушбу муҳим ҳужжат имкон қадар тез фурсатда имзоланиши ва ратификация қилинишига умид билдирди.
Европа Иттифоқи компанияларидан Ўзбекистонга тўғридан-тўғри инвестициялар, энг янги технологиялар, илғор тажриба ва юксак стандартларни жалб қилиш масалаларига алоҳида эътибор қаратилди. Ўзбекистон томони хорижий, шу жумладан Европа Иттифоқи компанияларининг тўғридан-тўғри инвестицияларини жалб қилиш учун зарур шароитлар яратишга тайёрлигини билдирди.
Барқарор транспорт йўлакларини яратиш, шу жумладан Транскаспий мултимодал маршрутини ривожлантириш ўзаро савдони кўпайтириш учун тизимли омил сифатида белгиланди. Президентлар портларнинг қувватларини кенгайтириш, паром ва темир йўл паркларини кенгайтириш, божхона тартиб-таомилларини уйғунлаштириш, юклар билан ишлаш ва чегаралардан ўтиш учун рақамли ечимларни жорий қилиш муҳимлигини қайд этди.
Томонлар Ўзбекистон учун 2021—2027 йилларга мўлжалланган ЕИнинг молиявий-техник кўмагига доир кўп йиллик индикатив дастури тасдиқлангани ва амалга оширилиши бошланганини олқишлади.
Улар рақамлаштириш, «яшил» иқтисодиёт, энергетик самарадорлик ва сувдан фойдаланиш соҳаларида ўзаро манфаатли ҳамкорлик учун мавжуд салмоқли салоҳиятдан фойдаланиш, шу жумладан Европанинг илғор тажрибасини жорий қилиш ва ушбу соҳаларда қўшма лойиҳаларни амалга ошириш муҳимлигини қайд этди.
Таълим ва фан соҳасидаги ҳамкорликни, шу жумладан Erasmus+ ва Horizon Europe дастурлари салоҳиятидан фойдаланган ҳолда чуқурлаштириш муҳим экани таъкидланди. Томонлар касбий таълим бўйича «ДАРЯ» биринчи минтақавий лойиҳанинг амалга оширилишини олқишлади.
Ўзбекистон томони 2023 йилда Ўзбекистонда «Европа Иттифоқи—Марказий Осиё» биринчи туризм форумини ўтказишни таклиф қилди.
Минтақавий ва халқаро кун тартибининг долзарб масалалари ҳам муҳокама қилинган.
Мавзуга доир:
Изоҳ (0)