“Daryo” nashri 28-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin Janubiy Koreyani Ukrainaga qurol yetkazib berish Rossiya bilan munosabatlarni buzishi haqida ogohlantirdi.
Seulning Ukrainaga qurol-yarog‘ va o‘q-dorilar yetkazib berish qarori Rossiya va Koreya o‘rtasidagi munosabatlarga putur yetkazishi mumkin. Bu haqda Rossiya prezidenti Vladimir Putin aytib o‘tdi, deb yozadi “Interfaks”.
“Bizning Koreya bilan aloqalarimiz juda do‘stona. Va biz doim Koreya bilan ham, KXDR bilan ham muloqot olib borish imkoniyatiga ega bo‘lganmiz. Ammo hozir bizga ma’lum bo‘lishicha, Koreya Ukrainaga qurol-yarog‘ va o‘q-dori yetkazib berishga qaror qilgan. Bu munosabatlarimizni buzadi”, — dedi u “Valday” xalqaro muhokama forumi yalpi sessiyasida nutq so‘zlar ekan.
“Biz Shimoliy Koreya bilan yadro yo‘nalishida hamkorlikni qayta tiklasak, Koreya bunga qanday qaragan bo‘lardi?” — degan savolni o‘rtaga tashladi Rossiya prezidenti.
Bunga javoban Janubiy Koreya prezidenti Yun Sok Yol mamlakat hech qachon Ukrainaga qirg‘in qurolini taqdim etmaganini aytdi.
“Biz dunyo hamjamiyati bilan birdamlik belgisi sifatida Ukrainaga gumanitar va tinchlik yordamini berganmiz, biroq hech qachon qirg‘in quroli yoki shunga o‘xshash biron narsa taqdim etmaganmiz”, — deya prezident gaplaridan iqtibos keltirdi Yonxap agentligi.Eron yangi yadro reaktori qurishni boshladi
Eron 27-oktabr kuni mamlakat markazida joylashgan Isfaxon shahrida quvvati 10 megavattga teng yangi tadqiqot yadro reaktorini qurishga kirishdi, deb xabar bermoqda Tasnim agentligi.
Reaktor qurilishi bo‘yicha loyihaning ochilish marosimi Eron Atom energiyasi tashkiloti rahbari Muhammad Islomiy ishtirokida bo‘lib o‘tdi.Agentlik qayd etishicha, yangi reaktor hovuzli tipga tegishli. U 20 foizga boyitilgan plastinkasimon yonilg‘ida ishlab, tibbiyot va sanoatda qo‘llaniladigan radioizotoplarni ishlab chiqarish, neytron nurlanish sohasidagi tadqiqotlarni rivojlantirish va yadroviy yonilg‘i uchun materiallarni sinovdan o‘tkazish maqsadlarida foydalaniladi. Reaktorni loyihalashtirish va qurish faqat eronlik mutaxassislar tomonidan amalga oshirilmoqda, deyiladi xabarda.
MAGATE Shimoliy Koreya yadro sinovlariga tayyorgarlik ko‘rayotganini ma’lum qildi
MAGATE (Atom energiyasi bo‘yicha xalqaro agentlik) KXDRda yadro quroli sinovdan o‘tkazilishi ehtimoli yuzasidan xavotir bildirmoqda, deb yozadi Anadolu agentligi.
MAGATE rahbari Rafael Grossi so‘zlariga ko‘ra, KXDRda yadro quroli ishtirokidagi yangi sinovlar kuchli xavotir uyg‘otadi.Agentlik KXDRda hisob bo‘yicha yettinchi yadro sinovlariga tayyorgarlik ko‘rilayotganini aniqlagan, biroq yadroviy portlash shu yaqin orada sodir bo‘lishidan darak beruvchi belgilar yo‘q.
“Hamma nafasini ichiga yutdi. Ilg‘orroq sinovlar shuni anglatadiki, ular tayyorgarlikni va arsenal yaratishni kuchaytirgan. Mana shuning uchun ham biz buni juda diqqat bilan kuzatyapmiz”, — dedi u.
Yaponiya, AQSH va Janubiy Koreya KXDR yadro sinovlari o‘tkazgan taqdirda, unga “misli ko‘rilmagan darajada javob” qaytarishga kelishib olgandi.
2022-yil boshidan buyon Pxenyan BMT rezolyutsiyasini buzgan holda, turli masofali ballistik raketalar ishtirokida 20 dan ortiq sinovlar o‘tkazgan.
Ayni paytda Yaponiya AQSHdan Tomahawk raketalarini sotib olish muzokaralarini so'nggi bosqichidaO‘zbekiston rasmiylari Orlovda safarbarlik chaqiruv qog‘ozi olgan vatandoshlar bilan uchrashdi
O‘zbekistonning Moskvadagi elchixonasi va Tashqi mehnat migratsiyasi agentligining Rossiyadagi vakolatxonasi vakillaridan iborat ishchi guruh Orlovda safarbarlik chaqiruv qog‘ozi olgan o‘zbekistonliklar bilan uchrashdi.
Tashqi mehnat migratsiyasi agentligining ma’lum qilishicha, vatandoshlar bilan bir qatorda ular ishlayotgan tashkilot rahbari bilan ham suhbatlashilgan. O‘zbekistonlik mehnat migrantlariga xatolik tufayli safarbarlikka jalb qilish uchun chaqiruvlar berilgan. Bu haqda ish beruvchidan rasmiy xat olindi.
Agentlik o‘zbekistonlik mehnat migrantlaridan yana bir bor harbiy harakatlarga aralashmaslikni, nizoli hududlarga bormaslikni hamda bunday holatlarga duch kelsa, Tashqi mehnat migratsiyasi agentligi va boshqa vakolatli tashkilotlarga murojaat qilishlarini so‘radi.
Izoh (0)