Хитой Тайвандан воз кечиши ва бунинг ўрнига Россия шарқини эгаллаб олиши мумкин — эксперт

Хитой Тайвандан воз кечиши ва бунинг ўрнига, Кремлнинг заифлашганидан фойдаланиб, Россия шарқини эгаллаб олиши мумкин. АҚШ миллий хавфсизлиги бўйича таҳлилчи Крейг Хупер шундай фикр билдирди, деб ёзади Forbes.

Хитой Коммунистик партияси қурултойи якунига келиб, Си Цзиньпин ҳар қачонгидан кўра кучайди, ҳатто ички мухолифат қолдиқларини залдан намойишкорона қувиб чиқарди ва ўзини учинчи марта беш йиллик муддатга тайинлади. Энди Ғарб Сининг Хитой ҳудудий амбициялари бўйича шафқатсиз ёндашуви Тайван туфайли ҳарбий зиддиятга айланиб кетишидан хавфсирамоқда. Бироқ Хупернинг фикрича, улар ортиқча хавотирланяпти — Хитой учун ҳақиқий ҳудудий имконият шимолда, Россиянинг Узоқ Шарқида ётибди, у ерда Россия фуқаролари бўлган юз минглаб этник хитойликлар яшайди.

Зиддият учун асослар чуқур илдизга эга. Хитой ва Россия юз йиллар давомида ўзларининг умумий чегараси устида тортишган ва курашган, «расмий» битим эса 2008 йилдагина қабул қилинган. Аммо Хитой Россиядан Владивостокни ҳамда у 1860 йилдан буён эгалик қилиб келаётган қарийб 23 минг квадрат мил майдонга эга собиқ Хитой ҳудудларини қайтариб беришни талаб қилиб, жорий келишувларни бекор қилиш учун осонгина баҳона топиши мумкин, деди эксперт.

Агар Хитой яқин вақтлар ичида Тайван томонга ҳаракат қилса, кенг кўламли зиддият муқаррар бўлади. Лекин агар Хитой шимолдаги ҳудудни босиб олса, янги ресурсларни қўлга киритади ва ҳатто, россиялик диктаторни майдондан олиб ташлашга ёрдам бергани учун, халқаро ҳурматга сазовор бўлади.

Хитойнинг Россиянинг Осиё қисмини қайтариб олишга интилиши мантиқли. Тайван Хитойга низодан бошқа нарсани олиб келмайди, Россияни Осиёдан сиқиб чиқаришга уриниш эса оч ва экспансияга интилаётган Хитой давлати учун манфаатлироқ имкониятларни очиб беради, дея хулоса қилади таҳлилчи.