Хитой собиқ раиси Ху Цинтао Компартия йиғилишидан олиб чиқиб кетилиши билан боғлиқ янги тафсилотлар пайдо бўлди (видео)

Интернетда Хитой халқ республикаси собиқ етакчиси Ху Цинтаонинг Пекинда Коммунистик партия қурултойи йиғилишида залдан олиб чиқиб кетилиши билан боғлиқ янги кадрлар пайдо бўлди, деб ёзади Tengrinews.

Видеода Сзинтао мажлисдан чиқариб кетилишидан олдин бўлган воқеалар акс этган.

Видео залда Ху билан ёнма-ён ўтирган Бутунхитой халқ вакиллари йиғилиши доимий қўмитаси раиси Ли Чжаншу ундан қўлидаги ҳужжатларни олиб қўйиб, қизил жилдга қайтариб солиб қўйиши ва унга нимадир дейиши билан бошланган.

Дастлаб у қоғозларни собиқ етакчнинг қаршисида қолдирган. Сўнг, афтидан, Ху Цинтао ҳужжатни яна олишга уринаётганидан хавотирланиб, Ли қоғозларни ўзи томонга тортиб олган.

Шундан кейин Хитой раиси Си Цзиньпин бир одамга кўрсатмалар берган, у эса Хуни кетишга кўндирмоқчи бўлган. Туриб кетаётганида собиқ раис ўз давомчисининг стол устида турган қайдларини олмоқчи бўлган. Аммо Си қоғозларни ушлаб қолиш учун қўлини чўзган.

Аввалроқ «Sinxua» расмий ахборот агентлиги Ху Цинтаонинг тўсатдан кетиб қолишини унинг соғлиғи ёмонлашгани билан изоҳлаган, лекин ҳеч қандай тафсилотларни келтирмаган эди.

Таъкидлаш жоиз, Channel News Asia телеканали томонидан тасвирга олинган янги лавҳалар Хунинг мазаси қочгани ҳақидаги расмий версияга зид эмас. Айни вақтда эса улар воқеада Ху Цинтао қаршисида ётган ҳужжатга қандай муносабатда бўлгани ҳам рол ўйнаганини тахмин қилиш имконини беради.

Аввалроқ Хитой собиқ раҳбари Ху Цинтао Компартия қурултойида залдан мажбуран олиб чиқиб кетилгани ҳақида хабар берилган эди. Видеолавҳаларга қараганда, 79 ёшли Ху учун бу кутилмаган вазият бўлган, у ўз жойини тарк этишни истамаган.

Ху Цинтао президиумда мамлакатнинг амалдаги раиси Си Цзиньпин билан ёнма-ён ўтирган. Ху Цинтао президиумни тарк этаётганида Сига қарата нимадир деди, у эса бунга жавобан бош ирғиди. Шундан кейин Хитой собиқ раҳбари мажлислар залидан олиб кетилган.

Қурултойнинг ёпилиш маросимида Ху Цинтаонинг жойи бўш қолган. Хитой Коммунистик партиясининг 16 октябрдан 22 октябргача бўлиб ўтган қурултойидан кейин Си Цзиньпин яна беш йиллик муддатга партия ва мамлакат етакчиси сифатида сайланди.

Ху Цинтао 2003 йилдан 2013 йилгача Хитой етакчиси бўлган ва беш йиллик иккита муддатдан кейин ҳокимиятни Си Цзиньпинга топширган.