Markaziy bank boshqaruvining 2022-yil 27-oktabrdagi yig‘ilishida “Pul-kredit siyosatining 2023-yil va 2024—2025-yillar davriga mo‘ljallangan asosiy yo‘nalishlari”ning dastlabki konseptual loyihasi ma’qullandi.
Unga ko‘ra, Asosiy ssenariy doirasida 2023-yilda iqtisodiy o‘sish darajasi real hisobda 4,5—5 foiz atrofida, 2024-yilda 5—6 foiz va 2025-yilda 6—6,5 foiz atrofida bo‘lishi prognoz qilinmoqda.
Inflyatsiya 2023-yil so‘ngida 8,5—9,5 foizgacha pasayishi va 2024-yilning ikkinchi yarmida 5 foizlik targetga yaqinlashishi (5—6 foizlik prognoz) kutilmoqda.
Muqobil ssenariy bo‘yicha 2023-yilda YIMning real o‘sishi 3—3,5 foiz atrofida bo‘lishi, 2024-yilda 4—4,5 foizni va 2025-yilda 4—5 foizni tashkil etishi prognoz qilinmoqda.
Bunda, xatarlarning ta’sir ko‘lami iqtisodiy o‘sish ko‘rsatkichlarining shakllanishida muhim o‘rin tutishi kutilmoqda.
Inflyatsiya darajasi 2023-yilda 7—8 foizgacha pasayishi, biroq 5 foizlik targetga erishish masalasi 2025-yilga kechikishi mumkin.
Shuningdek, O‘zbekistonda yilning ikkinchi choragidan boshlab iqtisodiy faollikning jadallashib borishi kuzatilmoqda. Joriy yilning 9 oyi yakuni bo‘yicha yalpi ichki mahsulotning real o‘sishi 5,8 foizni tashkil etib, yil yakuni bo‘yicha real o‘sish tahliliy hisob-kitoblar bo‘yicha 5,2—5,8 foiz atrofida bo‘lishi kutilmoqda (avvalgi prognoz 5—5,5 foiz).
Avvalroq O‘zbekistonda asosiy stavka yana 15 foiz darajasida o‘zgarishsiz qoldirilgani haqida xabar berilgan edi.
Izoh (0)