Ўзбекистон иқтисодиёти кейинги уч йилда қандай ўсиши прогноз қилинди

Марказий банк бошқарувининг 2022 йил 27 октябрдаги йиғилишида «Пул-кредит сиёсатининг 2023 йил ва 2024—2025 йиллар даврига мўлжалланган асосий йўналишлари»нинг дастлабки концептуал лойиҳаси маъқулланди. 

Унга кўра, Асосий сценарий доирасида 2023 йилда иқтисодий ўсиш даражаси реал ҳисобда 4,5—5 фоиз атрофида, 2024 йилда 5—6 фоиз ва 2025 йилда 6—6,5 фоиз атрофида бўлиши прогноз қилинмоқда.

Инфляция 2023 йил сўнгида 8,5—9,5 фоизгача пасайиши ва 2024 йилнинг иккинчи ярмида 5 фоизлик таргетга яқинлашиши (5—6 фоизлик прогноз) кутилмоқда.

Муқобил сценарий бўйича 2023 йилда ЯИМнинг реал ўсиши 3—3,5 фоиз атрофида бўлиши, 2024 йилда 4—4,5 фоизни ва 2025 йилда 4—5 фоизни ташкил этиши прогноз қилинмоқда. 

Бунда, хатарларнинг таъсир кўлами иқтисодий ўсиш кўрсаткичларининг шаклланишида муҳим ўрин тутиши кутилмоқда.

Инфляция даражаси 2023 йилда 7—8 фоизгача пасайиши, бироқ 5 фоизлик таргетга эришиш масаласи 2025 йилга кечикиши мумкин.

Шунингдек, Ўзбекистонда йилнинг иккинчи чорагидан бошлаб иқтисодий фаолликнинг жадаллашиб бориши кузатилмоқда. Жорий йилнинг 9 ойи якуни бўйича ялпи ички маҳсулотнинг реал ўсиши 5,8 фоизни ташкил этиб, йил якуни бўйича реал ўсиш таҳлилий ҳисоб-китоблар бўйича 5,2—5,8 фоиз атрофида бўлиши кутилмоқда (аввалги прогноз 5—5,5 фоиз).

Аввалроқ Ўзбекистонда асосий ставка яна 15 фоиз даражасида ўзгаришсиз қолдирилгани ҳақида хабар берилган эди.