Rossiyaga qarshi sanksiyalar tufayli jahon neft bozorida “qayta tuzilish” o‘tkazilmoqda

Rossiyaga qarshi sanksiyalar tufayli jahon neft bozori hozirda tarkibiy o‘zgarishlarni boshdan kechirmoqda. Bu haqda Forbes xabar bermoqda.

Saudiya Arabistoni Rossiya neft oqimini Yevropadan Osiyoga, boshqa ishlab chiqaruvchilar esa teskari yo‘nalishga yo‘naltirayotgan vaziyatga moslashmoqda.

Saudi Aramco neft kompaniyasining bosh ijrochi direktori Amin Nosirning so‘zlariga ko‘ra, Rossiya o‘z neftiga tegishli chegirmalar bersa, uni turli bozorlarga joylashtirishi mumkin bo‘ladi.

Chegirmalar Rossiyaga neftni sug‘urtalash va tashish bilan bog‘liq, sanksiyalar tufayli yuzaga kelgan qiyinchiliklarni yengib o‘tishga imkon beradi, — deya tushuntirdi Nosir.

Rossiya hamon Yevropaga eng yirik neft yetkazib beruvchi bo‘lib qolmoqda, biroq uning yetkazib berishdagi ulushi 21 foizga tushib ketdi. Bir yil avval esa u o‘rtacha 34 foizni tashkil qilardi.

“Rossiya logistika, sug‘urta bilan bog‘liq qiyinchiliklarga duch kelmoqda. Ammo buni to‘g‘ri chegirma bilan hal qilish mumkin. Garchi ko‘proq vaqt talab qilsa ham, oqim Osiyoga ketadi. Ilgari Osiyoga ketayotgan neft esa endi Yevropa va dunyoning boshqa qismlariga yetkazilmoqda, — dedi Saudi Aramco top-menejeri.

Saudi Aramco dunyodagi eng yirik neft kompaniyasi va dunyodagi eng qimmat davlat kompaniyalaridan biridir. U Saudiya Arabistoni rasmiylari tomonidan nazorat qilinadi.

Avvaroq Saudiya Arabistoni Yevropaga neft yetkazib berish hajmini ikki baravar oshirgani haqida xabar berilgandi.