Исроил мамлакат хавфсизлиги нуқтаи назаридан Украинага ҳаво ҳужумига қарши мудофаа тизимларини етказиб бера олмайди. Бу ҳақда мамлакат президенти Ицхак Герцог айтиб ўтди, деб ёзади CNN.
Исроил президенти маълум қилишича, гап муайян сирлар ҳақида бормоқда, улар душманлар қўлига тушмаслиги керак.
«Шундай қурол борки, бизда ҳатто унинг экспорт учун версияси йўқ. Шундай нарсалар борки, улар душманларимиз қўлига тушиб қолишини хоҳламаймиз. Лекин ёрдам беришимиз мумкин бўлган ҳамма нарсаларда кўмак кўрсатишга ҳаракат қиляпмиз», — деди Герцог.
Унинг бу баёноти Украина мудофаа вазири Алексей Резниковнинг Исроилга «Темир гумбаз» мудофаа тизимини сўраб қилган мурожаатига жавобан янграган.
Исроил президенти АҚШда президент Жо Байден билан учрашди. Учрашув, асосан, Эрон муаммосига, шу жумладан, Эроннинг Украинадаги урушга аралашувига бағишланди.
Ицхак Герцог Эрон Россияга қурол етказиб бераётгани, у эса Украинада тинч аҳолини ўлдиришда қўлланилаётганини қоралади. Бундан ташқари, президентлар Эрон ядро дастурини ва Эрон ҳукуматининг намойишларда ўз фуқароларига қарши хатти-ҳаракатларини муҳокама қилди.
Ундан аввал эса Герцог давлат котиби Энтони Блинкен билан учрашиб, Исроил Эрон Россияга учувчисиз учар қурилмалар етказиб бераётгани ҳақида разведка маълумотларини тақдим этганини билдирди.
Аввалроқ Исроил президенти Ицхак Герцог АҚШга ташрифи чоғида Россия Украина ҳудудида Эрон дронларидан фойдаланганига оид далилларни эълон қилиши ҳақида хабар берилганди.
Исроил ва Украина муносабатлари
13 октябрь куни Киев вилоятида муҳим инфратузилма объектлари камикадзе дронлар зарбаларига учраган эди. Шундан кейин Украина ташқи ишлар вазири Дмитрий Кулеба Исроил ҳукуматига расмий нота юбориб, Киевга ҳаво ҳужумига қарши мудофаа тизимларини етказишни сўрашини маълум қилганди.18 октябрь куни Исроил ва Украина мудофаа вазирлари Бенни Ганс ва Алексей Резников ўртасида телефон орқали мулоқот ўтказилиши керак эди, бироқ Исроил томони сўнгги лаҳзада қўнғироқни рад этди.
Музокаралардан бош тортилишини нашр Россия Хавфсизлик кенгаши раиси ўринбосари Дмитрий Медведевнинг баёноти билан боғламоқда, у аввалроқ «Исроил томонидан Киевга қурол-яроғ берилиши мамлакатларимиз ўртасидаги барча давлатлараро муносабатларни бузиши» ҳақида огоҳлантирганди. Эртаси куни Ганс Исроил Украинага қурол тақдим этмаслигини маълум қилди.
Кейинроқ эса Исроил Украина ҳарбийларига Эрон дронларига қарши курашиш учун зарур бўлган разведка маълумотларини тақдим этиб келгани маълум бўлди.
«Темир гумбаз» ракетага қарши мудофаа тизимини Украинага ўтказиш масаласи 2021 йил сентябрида ҳам кўтарилган эди. Ўшанда Politico манбасига таяниб, америкалик конгрессменларнинг баъзилари Киевга иккита шундай тизимни етказиб беришни таклиф қилганини ёзган. Нашр суҳбатдошига кўра, бу «Украинанинг Россиядан бўлаётган таҳдидни зарарсизлантиришга» ёрдам бериши керак эди.
Россиянинг Украинадаги босқини бошланганидан бери Исроил мамлакатга гуманитар ёрдам, шунингдек, ўқ ўтказмайдиган жилет ва дубулға каби жиҳозлар етказиб берди. Бироқ Украинанинг Исроилдаги элчиси Евгений Корнийчук бу таъминотда муаммолар борлигини айтган. Унинг сўзларига кўра, Исроил Украина сўраганидан анча кам жилет ва дубулға жўнатган, шунингдек, маҳсулотлар бешинчи эмас, учинчи тоифада бўлгани сабабли самарасизроқ бўлган.
Эрон дронлари
Россияга камикадзе дронларни Эрон етказиб бераётгани ҳақида АҚШ ва Европа мамлакатлари ҳукуматлари гапирганди. Бу ҳақда Америка ОАВлари ҳам ёзганди. Хусусан, The Washington Post манбаларига кўра, Теҳрон Москвага «ўнлаб» Mohajer-6 ва кўп сонли Shahed-136 учувчисиз учар қурилмаларини тақдим этмоқчи бўлган. 20 октябрь куни Евроиттифоқ Эроннинг дрон ишлаб чиқарувчи Shahed компаниясига қарши санкциялар киритди.Россиянинг БМТдаги миссияси Ғарб мамлакатлари маълумотларини дезинформация кампанияси ҳамда Москва ва Теҳронга босим ўтказиш учун тўқиб чиқарилган баҳона деб атади. Эроннинг БМТдаги доимий вакили Амид Саид Ираваний ҳам дронлар етказиб берилаётгани ҳақидаги айбловлар асоссиз эканини айтганди.
Изоҳ (0)