Rossiyaliklar G‘arbning yirik aktivlariga sarmoya kiritish uchun Bridgewaters venchur fondi va unga aloqador kompaniyalardan foydalangan. Bu haqda The Wall Street Journal korporativ hujjatlarga tayanib xabar berdi.
Xususan, nashr ma’lumotlariga ko‘ra, Kremniy vodiysida lidar tizimlar va unga aloqador texnologiyalarni ishlab chiquvchi Quanergy Systems Inc. texnologik startapida fevral oyida rossiyalik sarmoyador — biznesmen Alisher Usmonov paydo bo‘lgan. WSJ da’vo qilishicha, Quanergy Systems Inc.’ning qariyb 16 foizi San-Fransiskoda joylashgan Rising Tide V LLC venchur fondiga tegishli bo‘lib, u esa Usmonov sarmoya kiritadigan Bridgewaters fondi tomonidan qo‘llab-quvvatlanadi.
Nashr da’vo qilishicha, ushbu fondga bog‘liq kompaniyalardan investitsiyalar uchun foydalanganlar orasida Davlat dumasi deputati Andrey Skoch, “Rostex” rahbari Sergey Chemezov, Rossiya prezidenti matbuot kotibi Dmitriy Peskovning qarindoshlari, shuningdek, VTB banki ham bor.
Quanergy o‘z hujjatlarida Usmonov Rising Tide V kompaniyasida katta ulushga egalik qilganini ko‘rsatgan, deyiladi xabarda.
Usmonovning vakili u “Rossiyadan pul olib chiqish” uchun investitsiyalardan, shu jumladan, Quanergy’dan foydalangani haqidagi da’volar “yolg‘on va haqoratli” ekanini aytdi.
Quanergy — GTI fondining (Usmonov uning minoritar aksiyadori) investitsiyalaridan biri. Janob Usmonov GTI aksiyalarining kichik paketiga bilvosita egalik qilsa-da, ushbu kompaniya qoidalariga ko‘ra, mas’uliyati cheklangan sherik sifatida fondning qandaydir qarorlariga ta’sir o‘tkaza olmaydi yoki uni boshqara olmaydi. Janob Usmonov o‘zining halol daromadlarini yuqori texnologik aktivga sarmoya sifatida kiritgani bilan bog‘liq hech qanday muammolarni ko‘rmayapmiz, so‘nggi 20 yildan buyon u buni muvaffaqiyatli amalga oshirib kelmoqda”, — dedi Usmonovning vakili.
Izoh (0)