Ukraina mudofaa vaziri mamlakatni G‘arb qurollarini sinovdan o‘tkazish uchun poligon deb atadi

Ukrainaga qurol-yarog‘lar yetkazib berish G‘arb mamlakatlariga ularni jangovar harakatlar sharoitida tekshirib ko‘rish imkonini beradi, vaziyat ular o‘rtasida samaradorlik darajasi bo‘yicha musobaqaga o‘xshaydi, dedi Ukraina mudofaa vaziri Aleksey Reznikov Politico nashriga bergan intervyusida.

Uning aytishicha, Ukraina armiyasi ixtiyorida sakkizta 155 millimetrli turli artilleriya tizimlari bor va ularni jangda qo‘llamoqda.

Reznikov kelajakda Abrams tanklari va F-16, F-15 yoki Gripen qiruvchilarini qo‘lga kiritishlariga umid bildirdi. Uning qayd etishicha, bunday turdagi qurol-yarog‘lar yetkazib berilishining rad etilishi bu endi hech qachon ma’qullanmasligini bildirmaydi. Misol sifatida u Stinger ko‘chma zenit majmuasi bilan bo‘lgan vaziyatni keltirib o‘tdi: o‘tgan yil noyabrida AQSH uni Ukrainaga taqdim etishdan bosh tortgandi, biroq Rossiya qo‘shinlarini kiritishidan bir oy avval Litvadan bunday majmualarning yetkazilishi ma’qullangan.

Eng yaqin kelajakda Ukraina qurolli kuchlari uchun G‘arbda ishlab chiqarila oladigan asosiy tank tanlovi bosh masala bo‘lishi kerak, deya davom etdi Ukraina mudofaa vaziri. U buning uchun zarur sanoatga ega Buyuk Britaniya, Germaniya va Fransiya AQSHning tegishli siyosiy qarorini kutishini tan oldi.

Uning qo‘shimcha qilishicha, Kiyev Vashingtondan Switchblade kamikadze dronlari partiyasini kutmoqda. Ukraina va G‘arb mamlakatlari Rossiyaga dronlar yetkazib berishda ayblayotgan Tehron bu kurashda hozircha ustun kelmoqda, dedi u.

Reznikovning Ukrainada G‘arb qurol-yarog‘ tizimlari tekshirilishi ehtimoli haqidagi gaplarini Rossiya Tashqi ishlar vazirligi izohladi. “Buni biz allaqachon tushunib yetganmiz va dunyoni Kiyev rejimi tomonidan ‘iflos bomba’ qo‘llanilishi xavfidan ogohlantirganmiz”, — deb yozdi idora vakili Mariya Zaxarova.