Россияликлар Ғарбнинг йирик активларига сармоя киритиш учун Bridgewaters венчур фонди ва унга алоқадор компаниялардан фойдаланган. Бу ҳақда The Wall Street Journal корпоратив ҳужжатларга таяниб хабар берди.
Хусусан, нашр маълумотларига кўра, Кремний водийсида лидар тизимлар ва унга алоқадор технологияларни ишлаб чиқувчи Quanergy Systemс Inc. технологик стартапида февраль ойида россиялик сармоядор — бизнесмен Алишер Усмонов пайдо бўлган. WSJ даъво қилишича, Quanergy Systemс Inc.’нинг қарийб 16 фоизи Сан-Францискода жойлашган Rising Tide V LLC венчур фондига тегишли бўлиб, у эса Усмонов сармоя киритадиган Bridgewaters фонди томонидан қўллаб-қувватланади.
Нашр даъво қилишича, ушбу фондга боғлиқ компаниялардан инвестициялар учун фойдаланганлар орасида Давлат думаси депутати Андрей Скоч, «Ростех» раҳбари Сергей Чемезов, Россия президенти матбуот котиби Дмитрий Песковнинг қариндошлари, шунингдек, ВТБ банки ҳам бор.
Quanergy ўз ҳужжатларида Усмонов Rising Tide V компаниясида катта улушга эгалик қилганини кўрсатган, дейилади хабарда.
Усмоновнинг вакили у «Россиядан пул олиб чиқиш» учун инвестициялардан, шу жумладан, Quanergy’дан фойдалангани ҳақидаги даъволар «ёлғон ва ҳақоратли» эканини айтди.
Quanergy — GTI фондининг (Усмонов унинг миноритар акциядори) инвестицияларидан бири. Жаноб Усмонов GTI акцияларининг кичик пакетига билвосита эгалик қилса-да, ушбу компания қоидаларига кўра, масъулияти чекланган шерик сифатида фонднинг қандайдир қарорларига таъсир ўтказа олмайди ёки уни бошқара олмайди. Жаноб Усмонов ўзининг ҳалол даромадларини юқори технологик активга сармоя сифатида киритгани билан боғлиқ ҳеч қандай муаммоларни кўрмаяпмиз, сўнгги 20 йилдан буён у буни муваффақиятли амалга ошириб келмоқда», — деди Усмоновнинг вакили.
Изоҳ (0)