25-oktabr kuni bosh vazir o‘rinbosari — investitsiyalar va tashqi savdo vaziri Jamshid Xo‘jayev Turkiy davlatlar tashkiloti (TDT) bosh kotibi Bag‘dod Amreyev bilan uchrashdi.
Vazirlik matbuot xizmatining yozishicha, suhbat chog‘ida ikki tomonlama hamkorlikning dolzarb masalalari va ustuvor yo‘nalishlardagi hamkorlikni yanada rivojlantirish istiqbollari yuzasidan fikr almashildi.
2022-yilning noyabrida Samarqand shahrida o‘tkazilishi rejalashtirilgan Turkiy davlatlar tashkilotining birinchi sammiti va TDT iqtisodiyot va savdo vazirlarining 11-yig‘ilishini nazarda tutgan holda kengash doirasidagi yirik tadbirlarni tayyorlash masalalari muhokama qilindi. Tadbirlarni yuqori tashkiliy darajada va mazmunli o‘tkazish maqsadida o‘zaro hamkorlikni faollashtirish bo‘yicha kelishuvga erishildi.
Tashkilot doirasida savdo, investitsiyaviy va moliya sohalarida hamkorlikni yanada kengaytirish istiqbollari ko‘rib chiqildi. Qo‘shma investitsiya jamg‘armasini tashkil etish to‘g‘risidagi Bitimni imzolash va uni Toshkent shahrida joylashtirish jarayonini tezlashtirishdan o‘zaro manfaatdorlik bildirildi.
“Turkiy davlatlarning savdo hamkorligi ilmiy-tadqiqot markazi” va “Muhandislik va texnologiyalar markazi”ni tashkil etish tashabbuslarini amalga oshirish bo‘yicha aniq tadbirlar belgilandi. TDT davlatlari o‘rtasidagi savdo-iqtisodiy va sarmoyaviy aloqalarni yanada mustahkamlash uchun ushbu tashabbuslarni amalga oshirish muhimligi ta’kidlandi.
Uchrashuv yakunlari bo‘yicha tomonlar erishilgan kelishuvlar va yuqori darajada ilgari surilgan tashabbuslarni o‘z vaqtida amalga oshirish bo‘yicha keyingi amaliy chora-tadbirlar to‘g‘risida kelishib oldilar, shuningdek, O‘zbekiston va tashkilot o‘rtasidagi ko‘p qirrali hamkorlikni mustahkamlashga tayyorligini bildirdi.
Mavzuga doir: Samarqand sammitiga tayyorgarlik ko‘rishda Turkiy davlatlar tashkiloti bosh kotibiyati bilan hamkorlik qilishga kelishildi
Izoh (0)