Samarqandda 11-noyabr kuni Turkiy davlatlar tashkiloti sammiti bo‘lib o‘tadi

Samarqand shahrida 11-noyabr kuni Turkiy davlatlar tashkilotining navbatdagi sammiti bo‘lib o‘tadi. Shu munosabat bilan Tashqi ishlar vazirligi sammitni yoritish uchun xorijiy ommaviy axborot vositalari vakillarini akkreditatsiya qilish boshlanganini ma’lum qildi.

Qayd etilishicha, tadbirni yoritishda ishtirok etishni istagan chet el OAV vakillari TIVga quyidagi hujjatlarni topshirishi shart:

• OAV rahbariyatining o‘z muxbirini (muxbirlarini) akkreditatsiya qilish to‘g‘risidagi murojaatnomasi;
• OAV haqida ma’lumot;
• tarjimayi hol (rezyume / CV);
• pasport nusxasi;
• fotosurat (tomonlarn nisbati 3x4, maksimal o‘lchamlari 600x800 piksel, minimal - 240x320 piksel, yuz to‘liq ko‘ringan, oq fonda);
• COVID-19 ga qarshi emlash sertifikati;
• to‘ldirilgan so‘rovnoma.

Xorijiy OAV vakillarining arizalari 2022-yil 4-noyabr Toshkent vaqti bilan soat 18:00 ga qadar O‘zbekistonning xorijdagi diplomatik vakolatxonalari orqali yoki to‘g‘ridan to‘g‘ri O‘zbekiston Respublikasi Tashqi ishlar vazirligining ots-press@mfa.uzelektron manzili orqali qabul qilinadi.

Belgilangan muddatdan keyin yuborilgan murojaatlar, shuningdek, zarur ma’lumotlarsiz va to‘ldirilgan so‘rovnomasiz arizalar ko‘rib chiqish uchun qabul qilinmaydi.

Shu bilan birga, sammitni yoritishda ishtrok etish uchun xorijiy OAVning topshirgan arizalari O‘zbekiston Tashqi ishlar vazirligi tomonidan ularning akkreditatsiya qilinganligi to‘g‘risidagi tasdiqnomasiz O‘zbekistonga tashrif buyurish va jurnalistik faoliyati bilan shug‘ullanish uchun asos bo‘la olmaydi.

“Qo‘shimcha savollar yuzasidan O‘zbekiston Respublikasi Tashqi ishlar vazirligi Matbuot xizmatiga press@mfa.uz elektron pochtasi orqali murojaat qilish mumkin, — deyiladi xabarda.