Toshkent metropolitenida sumkasida bomba borligini ma’lum qilgan 19 yoshli qiz ushlangani haqida xabar berilgandi. “Gazeta.uz”ning yozishicha, qiz 5 sutkaga qamaldi.
Metropolitenda xavfsizlikni ta’minlash boshqarmasi boshlig‘i o‘rinbosari, podpolkovnik Hasan Haydarovning nashrga ma’lum qilishicha, shahar Jinoyat ishlari bo‘yicha Shayxontohur tuman sudining qarori bilan N.S. Ma’muriy javobgarlik to‘g‘risidagi kodeksning 183-moddasi (mayda bezorilik) va 199-moddasi (maxsus xizmatlarni qasddan aldab chaqirish) bilan aybli deb topilib, unga nisbatan 5 sutka ma’muriy qamoq jazosi hamda BHMning 1 barobari miqdorida jarima jazosi tayinlandi.
O‘zi nima bo‘lgandi?
Toshkent metropolitenining “Alisher Navoiy” bekatida 22-oktabr kuni 19 yoshli qiz sumkasini tekshirtirayotgan paytda uning ichida bomba borligini ma’lum qilgan.
2003-yilda tug‘ilgan qiz avtomatik o‘tkazish punktida o‘z xizmat vazifalarini bajarayotgan xodim tomonidan to‘xtatilgan. N.S. ismli qizdan Metropolitenda xavfsizlikni ta’minlash boshqarmasi xodimi sumkani ko‘rsatishni so‘raganida qiz sumkasida bomba borligini aytgan.
Ko‘rsatmaga ko‘ra, xodimlar zudlik bilan yaqin atrofdagi hududni o‘rab olgan va voqea haqida navbatchilik bo‘limiga xabar berilgan. Shundan so‘ng voqea joyiga Ichki ishlar vazirligi Maxsus operatsiyalarni muvofiqlashtirish boshqarmasi guruhi yetib kelgan. Qiz ham vaqtincha hibsga olingan.
Sumkani ko‘zdan kechirish chog‘ida undan portlovchi moslama topilmagan. Shundan so‘ng dalolatnoma tuzilgan. Xodim qizdan nima uchun sumkasida bomba borligini aytganini so‘raganida N.S. uning kayfiyati yaxshi bo‘lgani va shu tarzda hazil qilishga qaror qilganini aytgan. Qiz poytaxtning Shayxontohur tumani 3-ichki ishlar bo‘limiga olib ketilgan.
Faollar nima deydi?
Jurnalist Aziza Qurbonova voqea yuzasidan “5 sutka…?!” sarlavhali post qoldirdi va o‘zi bilan bog‘liq hikoya bilan o‘rtoqlashdi.
7-sinfdan 11-sinfgacha Chilonzor bekatidan to Buyuk ipak yo‘ligacha har kuni ikki mahal metroda qatnaganman. Keyin fakultet va TV o‘rtasida ham bordi-keldim metro orqali bo‘lgan. Bu 2000-2008-yillardagi gap; u paytda metroda, vagonlarda — hamma yerda hozirgidek reklamalaru yaltir-yulturlar emas, “Ogoh bo‘ling, ogoh bo‘ling” degan xavotirli yozuvlar yopishtirilgan bo‘lardi.O‘zimiz ham metroni qandaydir o‘ta muhim obyektligini his qilardik va har kuni “popkangni och, sumkangni ko‘rsat” degan gap-so‘zni kutmay, tugunimizni ochib ko‘rsatardik.
Allaqaysi yili, kattaroq sinfda o‘qib yurganimda tekshir-tekshirdan zerikib ketibmanmi, har kuni yuzi tanish bo‘lib ketgan militsioner amakiga hazillashibman: “shu kichkina sumkamning nimasini ko‘rasizlar, bomba olib yurarmidim, turniket qilib qo‘ysa bo‘lmaydimi?”
Militsioner amakining qoshlari chimirilib, “qani, bomba deganing uchun ham sumkani och” deb, kitoblarimni varaqlagancha yaxshilab tekshirishni boshlagan. Hatto kundaligimni ochib, kimligim va baholarimni ko‘rgan va keyin indamay… o‘tkazib yuborgan… O‘shanda rosa qo‘rqqanman va keyingi safar ortiqcha gapirmay, indamay sumkani ochib ko‘rsatishda davom etganman.
Hatto o‘sha butun mamlakatda “Ogoh bo‘ling!” sharpalari kezib yurganda, tinchlik eng katta ne’mat ekanligi uqtirilgan zamonda ham meni hech kim 5 sutkaga qamamagan edi…
Bu yerda esa 19 yoshli qiz kayfiyati yaxshiligi uchun hazillashgan ekan… 5 sutka qamoq va 1 BHM jarima berishibdi.
Ochig‘i, nimadir deyishga hayronman. Albatta, xavfsizlik jiddiy masala. Balki hazillashuvchilar ko‘payib ketmasligi uchun ibrat ko‘rsatmoqchi bo‘lishgandir. Kim bilsin. Qandaydir shu yerda “jazo qonuniy bo‘lishi mumkin, lekin adolatli bo‘lmasligi mumkin” degan gapni xulosa qilgim keldi, — deb yozadi jurnalist.
Izoh (0)