O‘zbekistonda yurak-qon tomir kasalliklaridan o‘lim ko‘rsatkichi 56,2 foizga kamaydi. Bu haqda Sog‘liqni saqlash vazirligi matbuot xizmati xabar berdi.
Butun dunyoda bo‘lgani kabi O‘zbekiston aholisi orasida yurak-qon tomir kasalliklariga chalinish holatlari ko‘p uchraydi. Ayniqsa, arterial gipertoniya, yurak ishemik kasalligi, yurak aritmiyalari, surunkali yurak yetishmovchiligi, tug‘ma yurak nuqsonlari eng ko‘p qayd etilayotgan xastaliklar sirasiga kiradi.
Mamlakatda tibbiyot, xususan, kardiologiya sohasiga qaratilayotgan e’tibor, uning moddiy-texnik bazasini rivojlantirish va hududlarda yo‘lga qo‘yilgan yuqori texnologik jarrohlik amaliyotlari natijasida keyingi yillarda bu borada bir qator ijobiy natijalarga erishilmoqda. Xususan, 2022-yilning 9 oyi davomida yurak-qon tomir kasalliklaridan o‘lim ko‘rsatkichi 56,2 foizga kamaydi.
Bunday natijaga erishishda Respublika ixtisoslashtirilgan kardiologiya ilmiy-amaliy tibbiyot markazida joriy etilayotgan ilg‘or davolash va eng so‘nggi diagnostika usullarining ahamiyati katta.
Shifoxonamiz yurtimizdagi eng yirik tibbiyot muassasalaridan biri hisoblanadi. Bu yerda ilmiy salohiyat bilan amaliy tibbiyot integratsiya qilingan bo‘lib, bemorlar belgilangan standartlar hamda klinik protokollar bo‘yicha sifatli davolanadi, — deydi markaz direktori o‘rinbosari Anvar Karimov.Bugungi kunda muassasada 5 ta — arterial gipertenziya, yurak ishemik kasalliklari, yurak aritmiyalari, yurak yetishmovchiligi va nekoronarogen miokard kasalliklari hamda funksional tekshiruvlar va klinik bioximiya ilmiy laboratoriyalari tashkil etilgan. Ularda yurak-qon tomir xastaliklariga chalingan bemorlarni o‘z vaqtida tashxislash va davolashni optimallashtirish, hayot uchun xavfli yurak kasalliklarini bartaraf etish bo‘yicha ilmiy izlanishlar olib boriladi.
Markazning funksional diagnostika, klinik bioximiya laboratoriyalari hamda klinik bo‘limlari eng zamonaviy yuqori texnologik tibbiy uskunalar bilan jihozlangan. Ayni paytda shifoxonada yurakning murakkab aritmiyalarida EFI/RCHA, AKSH operatsiyasini miniyondoshuv orqali amalga oshirish, bir vaqtning o‘zida bir necha jarrohlik amaliyotlarini bajaruvchi gibrid, qo‘shma operatsiyalar, tug‘ma yurak nuqsonlarini invaziv usulda bartaraf etish yo‘lga qo‘yilgan.
Bundan tashqari, yurak aritmiyalarida va surunkali yurak yetishmovchiligida dori vositalarini saralash va dozasini titrlash orqali bemorlarni davolash ham markaz faoliyatining o‘ziga xos yo‘nalishlaridan. Shu bois kardiologik xastaliklarga chalingan ko‘plab fuqarolar va qo‘shni mamlakatlar fuqarolari ushbu muassasa va uning hududiy filiallarida davolanib, o‘z salomatliklarini tiklamoqda.
2022-yilning 9 oyi davomida markazning maslahat poliklinikasiga jami 24 ming 700 nafar bemor murojaat qilib, ularga mutaxassislar tomonidan malakali tibbiy maslahatlar berildi. Shuningdek, 2022-yilning o‘tgan davri mobaynida 6 ming 325 nafar bemor muassasada statsionar sharoitda davolandi.
Izoh (0)