Ўзбекистонда юрак-қон томир касалликларидан ўлим кўрсаткичи 56,2 фоизга камайди. Бу ҳақда Соғлиқни сақлаш вазирлиги матбуот хизмати хабар берди.
Бутун дунёда бўлгани каби Ўзбекистон аҳолиси орасида юрак-қон томир касалликларига чалиниш ҳолатлари кўп учрайди. Айниқса, артериал гипертония, юрак ишемик касаллиги, юрак аритмиялари, сурункали юрак етишмовчилиги, туғма юрак нуқсонлари энг кўп қайд этилаётган хасталиклар сирасига киради.
Мамлакатда тиббиёт, хусусан, кардиология соҳасига қаратилаётган эътибор, унинг моддий-техник базасини ривожлантириш ва ҳудудларда йўлга қўйилган юқори технологик жарроҳлик амалиётлари натижасида кейинги йилларда бу борада бир қатор ижобий натижаларга эришилмоқда. Хусусан, 2022 йилнинг 9 ойи давомида юрак-қон томир касалликларидан ўлим кўрсаткичи 56,2 фоизга камайди.
Бундай натижага эришишда Республика ихтисослаштирилган кардиология илмий-амалий тиббиёт марказида жорий этилаётган илғор даволаш ва энг сўнгги диагностика усулларининг аҳамияти катта.
Шифохонамиз юртимиздаги энг йирик тиббиёт муассасаларидан бири ҳисобланади. Бу ерда илмий салоҳият билан амалий тиббиёт интеграция қилинган бўлиб, беморлар белгиланган стандартлар ҳамда клиник протоколлар бўйича сифатли даволанади, — дейди марказ директори ўринбосари Анвар Каримов.Бугунги кунда муассасада 5 та — артериал гипертензия, юрак ишемик касалликлари, юрак аритмиялари, юрак етишмовчилиги ва некоронароген миокард касалликлари ҳамда функционал текширувлар ва клиник биохимия илмий лабораториялари ташкил этилган. Уларда юрак-қон томир хасталикларига чалинган беморларни ўз вақтида ташхислаш ва даволашни оптималлаштириш, ҳаёт учун хавфли юрак касалликларини бартараф этиш бўйича илмий изланишлар олиб борилади.
Марказнинг функционал диагностика, клиник биохимия лабораториялари ҳамда клиник бўлимлари энг замонавий юқори технологик тиббий ускуналар билан жиҳозланган. Айни пайтда шифохонада юракнинг мураккаб аритмияларида EFI/RCHA, AKSH операциясини миниёндошув орқали амалга ошириш, бир вақтнинг ўзида бир неча жарроҳлик амалиётларини бажарувчи гибрид, қўшма операциялар, туғма юрак нуқсонларини инвазив усулда бартараф этиш йўлга қўйилган.
Бундан ташқари, юрак аритмияларида ва сурункали юрак етишмовчилигида дори воситаларини саралаш ва дозасини титрлаш орқали беморларни даволаш ҳам марказ фаолиятининг ўзига хос йўналишларидан. Шу боис кардиологик хасталикларга чалинган кўплаб фуқаролар ва қўшни мамлакатлар фуқаролари ушбу муассаса ва унинг ҳудудий филиалларида даволаниб, ўз саломатликларини тикламоқда.
2022 йилнинг 9 ойи давомида марказнинг маслаҳат поликлиникасига жами 24 минг 700 нафар бемор мурожаат қилиб, уларга мутахассислар томонидан малакали тиббий маслаҳатлар берилди. Шунингдек, 2022 йилнинг ўтган даври мобайнида 6 минг 325 нафар бемор муассасада стационар шароитда даволанди.
Изоҳ (0)