Namangan XTB TikTok’da mashhur bo‘lish uchun mushtlashgan o‘quvchilar bo‘yicha ma’lumot berdi

Namanganda bir guruh maktab o‘quvchilari mushtlashgani haqida xabar berilgan edi. Viloyat xalq ta’limi boshqarmasi axborot xizmati holat yuzasidan rasmiy munosabat bildirdi.

Ijtimoy tarmoqlarda Kosonsoy tumanidagi 50-maktab o‘quvchilari o‘rtasidagi mushtlashuv aks etgan videolavhadagi vaziyat tuman IIB hamda xalq ta’limi bo‘limi tomonidan ishchi guruhi tuzgan holda o‘rganilmoqda.

Ma’lum bo‘lishicha, mazkur holat shu maktabni 2021-yilda tamomlagan sobiq o‘quvchilar hamda maktabda hozirgi kunda ta’lim olayotgan yuqori sinf o‘quvchilari o‘rtasida 2021-yil noyabr oyida dars mashg‘ulotlaridan tashqari paytda sodir etilgan.

Holat yuzasidan tuman ichki ishlar bo‘limi va tuman xalq ta’limi bo‘limi tomonidan surishtiruv ishlari olib borilmoqda. O‘rganish yakuniga ko‘ra batafsil ma’lumot beriladi.