Navoiyda fuqaroni “Qoraqo‘tan” koniga ishga kiritib qo‘yish uchun 2,5 ming dollar so‘ragan shaxslar ushlandi

Navoiy viloyatida ishga kiritib qo‘yishni va’da qilgan firibgarlar ushlandi, deb xabar bermoqda Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Navoiy viloyat boshqarmasi tomonidan DXX va IIB bilan hamkorlikda tezkor tadbir o‘tkazilgan. Unda fuqarolar G‘.E. va N.E. (muqaddam firibgarlik jinoyati uchun sudlangan) fuqaro F.ning ishonchiga kirib, uning o‘g‘li S.ni tanishlari yordamida 2 500 dollar evaziga “Qoraqo‘tan” koniga ishga kiritib qo‘yishini aytgani aniqlangan. Ular oldindan 10 million so‘mni olgan vaqtlarida ashyoviy dalillar bilan qo‘lga olingan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.