AOKAda o‘tkazilgan brifingda Adliya vazirligi axborot xizmati rahbari Sevara O‘rinboyeva davlat xizmatlari ko‘rsatish sohasida aholiga yaratilayotgan yengilliklar to‘g‘risida ma’lumot berdi.
Ta’kidlanishicha, 2023-yil 1-yanvardan tug‘ilganlik haqida tibbiyot muassasalarida beriladigan QR-kodli ma’lumotnoma gerbli guvohnomaga teng hisoblanadi. Ma’lumotnomani davlat organlari va tashkilotlar tomonidan qabul qilishni rad etish qat’iyan taqiqlanadi.
Tug‘ilganlik haqidagi gerbli guvohnoma fuqarolarning istalgan vaqtdagi murojaatlariga asosan fuqarolik holati dalolatnomalarini yozish bo‘limlari tomonidan belgilangan miqdorda gerb yig‘imi undirilgan holda rasmiylashtirib beriladi.
Shuningdek, 2022-yil 1-noyabrdan 2023-yil 1-iyulga qadar nikoh tuzish va nikohdan ajratishni qayd etish uchun arizalarni Sirdaryo viloyatining tuman (shahar) davlat xizmatlari markazlari orqali qabul qilish bo‘yicha huquqiy eksperiment o‘tkazish belgilangan.
O‘tkazilgan huquqiy eksperiment natijalari bo‘yicha ushbu davlat xizmatlarini davlat xizmatlari markazlari orqali joriy etish maqsadga muvofiq deb topilgan taqdirda, qonunchilik hujjatlariga o‘zgartirish va qo‘shimcha kiritiladi.
Brifingda, shuningdek, tadbirkorlik subyekti bo‘lmagan yuridik shaxslarni davlat ro‘yxatidan o‘tkazish mexanizmlari va bu borada yaratilgan imkoniyatlar haqida ham ma’lumot berilgan.
Izoh (0)