«Дарё» нашри 25 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Украинага Беларусь ҳудудидан камикадзе дронлар билан зарба берди
25 октябрь куни эрталаб Киев шаҳри ва вилоятида ҳаво тревогаси эълон қилинди. Украина Ҳаво кучлари хабар беришича, Россия Беларусь ҳудудидан Shahed камикадзе дронларини учирган.
Ҳаво кучлари матбуот котиби Юрий Игнат сўзларига кўра, Россия Эронда ишлаб чиқарилган ўнта учувчисиз учар қурилмаларни учирган. «Улар Киевга айнан Беларусь йўналишида биринчи марта ҳужум қилаётгани йўқ, — деди у. — Улар Днепр ўзани бўйлаб учиб келмоқда».Игнатнинг қўшимча қилишича, кундуз куни дронларни уриб тушириш осонроқ, чунки нишонлар аниқроқ кўринади.
Аввалроқ Британия Мудофаа вазирлиги Украина Россия томонидан учирилаётган Эрон дронларини уриб туширишда тобора кўпроқ муваффақият қозонаётганини маълум қилганди.
АҚШда бир гуруҳ конгрессменлар Байденни Россия билан бевосита музокаралар бошлашга чақирди. Оқ уй бу ташаббусни қўллаб-қувватламади
АҚШ Демократик партиясидан 30 нафар Конгресс аъзоси президент Жо Байденга мактуб йўллаб, уни Россия билан тўғридан-тўғри музокаралар бошлашга чақирди. Уларнинг таъкидлашича, бу урушнинг тугашига олиб келиши мумкин, деб ёзмоқда The Washington Post.
Мурожаат муаллифларининг фикрича, Украинага мисли кўрилмаган ҳарбий ва молиявий ёрдам кўрсатаётган Байден «ўт очишни тўхтатишга реал асос» топиш учун Россия билан бевосита музокараларни ҳам бошлаши керак. Уларнинг таъкидлашича, дипломатик ечимдан бошқаси «ҳалокатли ва ақл бовар қилмайдиган хавфлар» билан «узоққа чўзилган уруш»ни англатади.
The Washington Post таъкидлаганидек, Демократик партиядаги бир гуруҳ сафдошлари биринчи марта Байденни Украинадаги урушга оид сиёсатни кескин ўзгартиришга чақирмоқда. Оқ уй АҚШ Давлат департаменти конгрессменларнинг мурожаатига изоҳ берар экан, Жо Байден ҳали Россия билан тўғридан-тўғри музокаралар ўтказиш ғоясини қўллаб-қувватламаётганини маълум қилди.
АҚШ президенти маъмурияти Миллий хавфсизлик кенгашининг стратегик алоқалар бўйича координатори Жон Кирби Украинанинг иштирокисиз Россия билан музокаралар олиб бориш ҳамон имконсиз эканини айтди. Давлат департаменти матбуот котиби Нед Прайснинг таъкидлашича АҚШ Россиянинг мулоқот ва дипломатик саъй-ҳаракатларга тайёрлигига белги кўрмаяпти.
Туркманистонда юзлаб маҳбуслар Украинадаги урушга юборилгани маълум қилинди
Туркманистонда камида 500 нафар рус тилида сўзлашувчи маҳбусларни йиғиб, Москвага юборишган, сўнг улар Вагнер гуруҳи таркибида Украинадаги урушга жўнатилган. Бу ҳақда туркманистонлик мухолифатчи сиёсатчи Мурод Қурбонов маҳаллий фаолларга таяниб маълум қилди.
Маҳбусларга гўёки Россия паспортлари берилган, улар ўн кун давомида ҳарбий тайёргарликдан ўтказилган, шундан кейин уларнинг ҳаммаси фронтга жўнатилган. Шартнома бўйича жанг қилиш эвазига судланганликни олиб ташлашни ва 1000 доллар тўлашни ваъда қилишмоқда. Туркманистон фуқароларининг ўлимини эса маҳаллий махсус хизматлар коронавирусга йўймоқда, уларнинг жасадлари қариндошларига берилмаслигини шу билан изоҳламоқда.
Аввалроқ «Вагнер» хусусий ҳарбий компанияси ва Россия Мудофаа вазирлиги «ёлловчилари» бутун мамлакат бўйлаб 15 130 нафар маҳбусни урушга олиб кетгани маълум қилинган эди.
Рамзан Қодиров Украинага фаол зарба беришга чақирди
Чеченистон раҳбари Рамзан Қодиров яна Украинадаги «махсус ҳарбий операция»нинг боришини танқид қилди ва Украина шаҳарларига кучлироқ зарба беришга чақирди. Бу ҳақда 24 октябрь, душанба куни у ўзининг Telegram каналида аудио қолдирди.
«Россия Украина томонидан Россиянинг янги ҳудудлари ўққа тутилишига кучсиз жавоб қайтармоқда», — деди у. Қодировнинг фикрича украиналиклар «Россия йўналишида» ўқ узишни хаёлига ҳам келтирмаслигини тушуниши учун қаттиқроқ чоралар кўриш зарур. Унинг сўзларига кўра, жанговар ҳаракатлар аллақачон «Россия ҳудудида» олиб борилмоқда. Қодиров ҳозирги вазиятдан жуда норози эканини, бироқ унинг фикрича, «бундан ёмонроғи» бўлмаслигини таъкидлади.
Жаҳон банки Буюк Британия кафолати остида Украинага 500 млн доллар ажратди,аммо Байден маъмурияти Украинага қўшин юборадими?
Жаҳон банки фавқулодда эҳтиёжларни қондириш учун Украинага қўшимча 500 млн доллар ёрдам ажратилишини эълон қилди. Бу ҳақда Reuters хабар бермоқда.
500 млн долларлик маблағ Буюк Британия кафолати остида ўтказилди. Қўшимча 30 млн долларга эса Дания кафил бўлади. Жаҳон банки президенти Дэвид Малпасснинг айтишича, маблағ асосий давлат хизматларини қўллаб-қувватлашга йўналтирилади.
У Украинада ҳарбий ҳаракатлар натижасида инфратузилма билан боғлиқ муаммолар мавжудлигини, бу эса қиш арафасида «Украина халқига хавф туғдираётганини» таъкидлади. Шу даврга қадар Жаҳон банки Украинага фавқулодда молиялаштириш учун 13 миллиард доллар ажратди.
Банк Украинанинг тикланишини 350 миллиард доллар деб баҳоламоқда. Украина ўзига керак бўладиган бюджет ёрдамини ойига 4-5 миллиард доллар деб баҳолаган. Киев Европа Иттифоқи 2 миллиард доллар ажратишини кутмоқда, шундан 500 миллион доллар Германиядан келади. Германия президенти Франк-Вальтер Штайнмайер бугун, 25 октябрь куни эрталаб эълон қилинмаган ташриф билан Киевга келди
Focus журналининг қайд этишича, Германия президенти Украинага уруш бошланганидан бери учинчи уринишда келган. Жаҳондаги ҳозирги вазиятдан келиб чиқиб Жо Байден маъмурияти Украинага қўшинлар юбормасликка ваъда бермоқда.
Изоҳ (0)