“Daryo” jurnalisti bilan axborot xizmati xodimiga xos bo‘lmagan ohangda suhbatlashgan departament xodimi ogohlantirildi

“Daryo”da e’lon qilingan maqolaga javoban jurnalist bilan axborot xizmati xodimiga xos bo‘lmagan ohangda gaplashishga uringan departament axborot xizmati xodimi ogohlantirildi. Bu haqda “Daryo”ga Bosh prokuratura huzuridagi iqtisodiy jinoyatlarga qarshi kurashish departamenti axborot xizmati rahbari Nurbek Halimov xabar berdi.

Avvalroq “Daryo” nashrida Toshkentda 600 million so‘mga yaqin xizmat haqini ololmayotgan quruvchilar haqida maqola e’lon qilingan edi. Unda Bosh prokuratura huzuridagi departamentning ma’muriy binosini ta’mirlashda ishtirok etgan quruvchilar xizmat haqini ololmayotgani xabar berilgandi. Mazkur holatni o‘rganishga kirishgan “Daryo” jurnalisti departament mas’ullari, xususan axborot xizmati xodimidan kerakli axborotni olishda qiyinchilikka uchragani uchun Bosh prokuratura axborot xizmati rahbari Hayot Shamsutdinovdan yordam so‘ragani, shundan so‘ng departament axborot xizmati xodimi “tilga kirgani” qo‘shimcha qilingan edi.

Maqolaning mazkur qismiga e’tiroz bildirgan departament axborot xizmati xodimi Dilrabo Kuryazova o‘z vaqtida vazifasini bajarmagani yetmagandek, maqola muallifi bilan telefon qo‘ng‘irog‘i paytida axborot xizmati xodimiga xos bo‘lmagan gaplarni gapirib, e’tiroz bildirgan.

Bilaman siz qitmir muxbirsiz, qitmir savollar berib, odamlarning shaxsiyatiga tegish sizning uslubingiz ekan-da. Lekin tilga kirdi deb yozishga sizning haqqingiz yo‘q edi, — deya jurnalistga qanday yozish kerakligini o‘rgatishga uringan u.

Aniqlanishicha, departament axborot xizmati xodimi Dilrabo Kuryazova axborot olishga uringan “Daryo” jurnalistini hech qanday kameralarsiz va hatto diktofonlarsiz suhbatga chaqirib, so‘ngra tasvirga olamiz deya va’da bergan. Biroq suhbatdan so‘ng jurnalistga kamera yoki diktofonga gapirmasligini, axborot berolmasligini ma’lum qilgan. Jurnalist axborotning to‘g‘ri va haqqoniyligini ta’minlash maqsadida mas’ullardan kimdir jurnalist savollariga javob berishi lozimligini uqtirgan. Foydasi bo‘lmagach, Bosh prokuratura axborot xizmati rahbari Hayot Shamsutdinov bilan suhbatlashib, savollarga javob olishda ko‘mak so‘ragan.

Shundan so‘ng esa Dilrabo Kuryazova axborot berish mas’uliyati o‘zida qolganini aytib, tayyorgarlik ko‘rib olish uchun vaqt so‘ragan. Lekin kelishilgan vaqtda jurnalist va axborot xizmati xodimi ko‘risholmagan. Dilrabo Kuryazova departament mas’ullari javobini audioyozuv shaklida jurnalistga yetkazgan. Ammo javob qoniqarsiz bo‘lgan. Shunga qaramasdan Dilrabo Kuryazovaning izohi mazkur maqoladan to‘liq o‘rin olgan. Maqola muallifi esa departament axborot xizmatining javobi qoniqarsiz ekanligini o‘ziga bildirgan. Shunga qaramasdan qo‘shimcha javob bo‘lmagan.

Bu holat yuzasidan xodimimizga tushuntirish ishlarini olib bordik va bu holat qayta takrorlanmaydi, — deydi Nurbek Halimov.