Бугун, 24 октябрь куни Олий судда Соғлиқни сақлаш вазирлиги ва собиқ ходим ўртасидаги низо такрорий кассация судлов ҳайъатида кўриб чиқилди. Бу ҳақда «Дарё» мухбири Мусулмонбек Иброҳимов хабар бермоқда.
Нима бўлган эди?
Соғлиқни сақлаш вазирининг тегишли буйруғи билан 2021 йилнинг июль ойида Комплеанс, ички аудит ва молиявий назорат хизмати бошлиғи Бахтиёр Хажихановни ишдан бўшатган эди. Бунга президентнинг собиқ маслаҳатчиси Абдужаббор Абдувоҳитовнинг ССВга юборган кўрсатма хати асос сифатида олинган. Давлат маслаҳатчисининг хатига мувофиқ ССВ ходимни Меҳнат кодексининг 106-моддаси 6-банди билан «қонунда назарда тутилган бошқа ҳоллар»да деган пункти билан ишдан бўшатиб юборган.
Фуқаролик ишлари бўйича Шайхонтоҳур туманлараро суди ва Тошкент шаҳар суди томонидан бу хат қонунга тенглаштирилиб, Меҳнат кодексининг 106-модда 6-банди бўйича тўғри бўшатилган деб топган.
Иш жорий йилнинг 21 сентябрь ойида Олий суднинг фуқаролик ишлари бўйича кассация судлов ҳайъати томонидан кўриб чиқилган. Унда судьялар меҳнат муносабатларини бекор қилиш масаласида бирор-бир қонун бўйича ваколатга эга бўлмаган давлат маслаҳатчисининг хати ходимларни тўғридан-тўғри ишдан олишга, хусусан, Меҳнат кодексининг 106-моддаси 6-банди билан меҳнат шартномасини бекор қилишга асос бўла олмайди деб топган эди.
Ажрим ўз кучида қолди
Бугун, бош прокурор ўринбосари Светлана Ортиқованинг Олий суднинг фуқаролик ишлари бўйича кассация судлов ҳайъати ажрими устидан киритган протестига асосан иш такрорий кассация судлов ҳайъатида кўриб чиқиш бошланганди. Киритилган протестда Олий суднинг аввалги ажримини бекор қилиш ҳамда ходимни ишга тиклаш тўғрисидаги талабларни қаноатлантирмаслик сўралган.
Судда бевосита иштирок этган «Дарё» мухбиринг хабар беришича, Олий судга бош прокурор томонидан алоҳида хат киритилган бўлиб чиққан. Яъни бош прокурор ўринбосари томонидан киритилган протестни қайтариб олиш тўғрисида хат киритилган.
«Бу суд қизиқ бўлди. Бош прокурор ўринбосари Светлана Ориқованинг собиқ ходим тўғри бўшатилган, деб иш берувчи ССВ фойдасига протест киритганди. Лекин амалиётда камдан кам учрайдиган ҳолат юз берди: бош прокурор ўринбосари нотўғри киритган протестни қайтариб олди. Ҳақиқатдан ҳам бу нотўғри қилганлигини англаб, тушуниб қайтариб олди. Биз учун ушбу ҳолат жуда катта янгилик бўлди. Натижада судлов ҳайъати бош прокурорнинг хатини қаноатлантирди ҳамда иш юритишни тугатди. Қонунчиликда кўзда тутилган мана бундай амалиётларни учраётганлиги фуқароларда нафақат Олий судга балки Бош прокуратурага бўлган ишонч ортишига ҳам олиб келади», — деди адвокат Саидали Мухторалиев.
Олий суднинг такрорий кассация судлов ҳайъати қарорига кўра, кассация судлов ҳайъатининг ажрими ўз кучида қолди. Яъни ССВдан ноҳақ бўшатилган собиқ ходим Бахтиёр Хажиханов ўз ишига тикланадиган ва унга етказилган моддий зарар (мажбурий прогул суммаси) ундирилиб бериладиган бўлди.
Изоҳ (2)
Етказилган зарарни бюджет эмас давлат маслаҳатчиси ўз ёнидан тўлаш керак анаўшанда буларни кўзи очилади.
Ey.... Bunday fuqarolardan qanchadan qancha, bu insonni omadlarini bersin, o'zlari ham yurist bo'lganliklari uchun oxirigacha kurashdilar, biroq prezidentning sobiq maslahatchisi Abdujabbor Abduvohitov hamda sobiq Oliy sud raisi Kozimjon Komilovlarning qilmishlaridan ancha buncha insonlar ishsiz qoldilar, eng qizig'i Abdujabbor yoki shunga o'hshagan insonlar tomonidan Prezident video selektor bayonnomasiga o'zgartirish kiritilib, ushbu bayonnoma asosida hamda ko'rsatma xatlar yuborilib ancha muncha hodim egallab turgan lavozimidan ozod etildi! Eng qizig'i bayonnomada go'yiki bu topshiriqni O'zR Prezidenti Shavkat Miromonovich Mirziyoyev topshirganday. Ammo Youtube.com video hostingidagi "Shavkat Mirziyoyev's Press-service" kanaliga qo'yib to'liq video selektor yig'ilishida esa bunday topshiriq umuman bo'lmaganligini ko'rish mumkin. Eng qizig'i, yuqoridagi maqolada aytib o'tilganidek bunday xujjatlar "qonunga tenglashtirilib" tuman, shahar sudyalari ishni ko'rib chiqish jarayonida da'vo arizalarni, keyinchalik apellyatsiya shikoyatlarini qanoatlantirmasdan, ishni yopib yuborishmoqda..! HAQIQAT - egiladi, bukiladi, biroq sinmaydi.... Ushbu maqolada keltirilgan holat kabi bir kunmas bir kun haqiqat yuzaga chiqadi yoki mazkur ishlarda noto'g'ri qaror qilganlarning o'ziga yokida yaqinlaridan qaydati!