Toshkent shahri Chilonzor tumanida joylashgan G‘afur G‘ulom nomidagi madaniyat va istirohat bog‘ida ta’mirlash ishlari yakuniga yetmoqda. Bu haqda tuman hokimligi axborot xizmati xabar berdi.
Qayd etilishicha, hozirda bog‘ning test rejimidagi (yopiq holatda) faoliyati sinab ko‘rilmoqda. Ya’ni o‘rnatilgan uskunalar aholi xavfsizligi uchun qayta-qayta sinovlardan o‘tkazilmoqda. Tozalash va tartibga keltirish ishlari olib borilmoqda.
Bog‘ning rekonstruksiya konsepsiyasi o‘zining yondashuvi bilan ajralib turadi.
Biz faqatgina poytaxtning eng yirik yashil hududlaridan birini saqlab qolishni emas, balki hududni yangi va turli daraxtlar, butalar va gullaydigan o‘simliklar bilan to‘ldirishni ham o‘z oldimizga vazifa sifatida qo‘ygandik. Tez orada bu yerda tabiat bilan uyg‘unlikni saqlagan holda haqiqatda ham dam olish mumkin bo‘ladi, — deydi bog‘ direktori o‘rinbosari Zafar Mirzaulukov.Ta’kidlanishicha, bog‘ning avvalgi tabiatini tiklash uchun ko‘p kuch va mablag‘ sarflandi. Hudud barcha rasta, kafe va kabob tayyorlaydigan joylardan tozalandi. Katta e’tibor landshaft dizayniga qaratildi va bunda bog‘ maksimal darajada tabiiy bo‘lib, uyg‘unlik saqlab qolindi. Asosiysi, bog‘dagi daraxtlar to‘liq saqlab qolindi va sug‘orish tizimi to‘liq o‘zgartirildi.
Bog‘ “ekofrendli” uslubida yangilandi. Xususan, eng kichik tashrif buyuruvchilar uchun o‘yin maydonlarida xorijda ishlab chiqarilgan to‘liq tabiiy kompozitsion materiallardan bo‘lgan turli arqonli zinalar, qoyalar va kanatlar o‘rnatildi.
Bog‘ga, shuningdek, charxpalak qaytarildi. Piyoda sayr qilish va yugurish yo‘laklariga joy bo‘shatish uchun bog‘da attraksionlar soni kamaytirilgan. Bunda tashkilotchilar attraksionlarni ularning ancha zamonaviy va xavfsiz turlariga o‘zgartirdi.
Bog‘ hududida joylashgan ikkita ko‘l to‘la ta’mirlanib, gidrotizimlar to‘liq o‘zgartirildi, shuningdek, ko‘llarning atrofida plyaj zonalari va tabiat qurshovida dam olish uchun joylar yaratildi. Ko‘llarning birida qayiq va katamaranlar saqlab qolinmoqda, ikkinchi ko‘l esa o‘rdaklar uchun ajratilgan.
Dam olish maskani tez kunlarda o‘z faoliyatini boshlaydi.
Mavzuga doir:
Izoh (1)
Nima boģga boshqa nom qurib qolibdimi. Òzbek tilini kuchaytiramiz deyishadi yana