Си Цзиньпин Хитой Коммунистик партияси раҳбари этиб учинчи муддатга қайта сайланди, деб хабар бермоқда Kyodo ахборот агентлиги.
Қайд этилишича, Хитой Коммунистик партияси Марказий қўмитаси сиёсий бюроси доимий қўмитаси ва ККП Марказий қўмитаси сиёсий бюросининг янги аъзолари номи эртага — 23 октябрь куни эълон қилинади. Нашрнинг ёзишича, келаси йил баҳорида нафақага чиқиши керак бўлган 67 ёшли Давлат кенгаши бош вазири Ли Кецян Коммунистик партиянинг олий бошқарув органи – Сиёсий бюро доимий қўмитаси аъзолигидан истеъфога чиққан.
Аввалроқ Хитой собиқ раҳбари Ху Сзинтао Компартия қурултойида залдан мажбуран олиб чиқиб кетилгани ҳақида хабар берилган эди. Видеолавҳаларга қараганда, 79 ёшли Ху учун бу кутилмаган вазият бўлган, у ўз жойини тарк этишни истамаган.
Ху Сзинтао президиумда мамлакатнинг амалдаги раиси Си Цзиньпин билан ёнма-ён ўтирган. Ху Сзинтао президиумни тарк этаётганида Сига қарата нимадир деди, у эса бунга жавобан бош ирғиди. Шундан кейин Хитой собиқ раҳбари мажлислар залидан олиб кетилган.
Қурултойнинг ёпилиш маросимида Ху Сзинтаонинг жойи бўш қолган. Хитой Коммунистик партиясининг 16 октябрдан 22 октябргача бўлиб ўтадиган қурултойидан кейин Си Цзиньпин яна беш йиллик муддатга партия ва мамлакат етакчиси сифатида сайланиши кутилаётганди.
Бунга қадар қурултой делегатлари Хитой Коммунистик партиясининг янги Марказий қўмитаси сайлаган ва раис Си томонидан таклиф этилган, Компартиянинг социализм ҳақидаги уставига тузатишларни маъқуллаган эди.
Ху Сзинтао 2003 йилдан 2013 йилгача Хитой етакчиси бўлган ва беш йиллик иккита муддатдан кейин ҳокимиятни Си Цзиньпинга топширган.
Изоҳ (0)