LG kompaniyasi Rossiyadagi zavod O‘zbekistonga ko‘chirlishi haqidagi xabarlar yuzasidan izoh berdi

Janubiy Koreyaning texnika ishlab chiqaruvchi LG Electronics kompaniyasi Rossiyadagi zavodini yopib, maishiy texnika ishlab chiqarishni Qozog‘iston yoki O‘zbekistonga ko‘chirish imkoniyatini ko‘rib chiqayotgani haqidagi xabarlarni rad etdi. Bu haqda “Kommersant” xabar bermoqda.

Avvalroq nashrning maishiy texnika bozoridagi manbasi LG kompaniyasi O‘zbekistonda Artel kompaniyasi bilan muzokaralar olib borayotganini ma’lum qilgandi.

“Ayni paytda bizning LG bilan sherikligimiz yo‘q, joriy muzokaralar haqidagi ma’lumotlarni esa oshkor qila olmaymiz”, — deya keyinroq Artel xabarlarni izohlagan.

Ayni paytda The JoongAng nashri LG’ga tayanib ma’lum qilishicha, ishlab chiqarish O‘zbekiston yoki Qozog‘istonga ko‘chirilishi haqidagi axborot “mutlaqo asossiz”dir.

Janubiy Koreyaning Business Post gazetasi ham LG Electronics Rossiyadagi zavodning O‘zbekiston yoki Qozog‘istonga ko‘chirilishi haqidagi xabarlarni “asossiz” deb atagani haqida yozgan. Konsern vakili Rossiya OAVlarida bu haqda paydo bo‘lgan ma’lumotlar ishonchli emasligini aytgan.

Eslatib o‘tamiz, Rossiya Ukrainaga bostirib kirishni boshlaganidan keyin Rossiyaga mahsulotlar yetkazib berishni to‘xtatganini ma’lum qilgan edi. Kompaniya rasmiy bayonotida aytilishicha, brend odamlar xavfsizligidan xavotirda hamda gumanitar ko‘mak berishda ishtirok etmoqda.