Россияда сафарбар этилганларнинг қарийб 10 минг нафари уйларига қайтарилган. Бу ҳақда Россия Давлат думасининг мудофаа қўмитаси раиси Андрей Картаполов маълум қилди, деб ёзади «ТАСС».
«Бугунги кунда қарийб 10 минг киши турли сабаблар билан қайтарилган», — деди у Санкт-Петербургда кўнгиллилар билан учрашув чоғида янглиш равишда сафарбар қилинганлар ҳақидаги саволга жавоб берар экан.
Россияда қисман сафарбарлик 21 сентябрь куни эълон қилинди ва 300 минг киши армияга чақилиши маълум қилинди. 14 октябрь куни аллақачон 222 минг сафарбар этилгани ҳақида хабар берилди.
Россия Мудофаа вазирлиги маълумотларига кўра, армияга 35 ёшгача бўлган оддий аскарлар ва сержантлар, 50 ёшгача бўлган кичик ва 55 ёшгача бўлган катта офицерлар чақирилади. Талабалар, кўп фарзандли оталар, саломатлиги жиҳатидан яроқсиз бўлганлар, оила аъзосини доимий парвариш қилиш билан банд бўлганларнинг армияга чақирилиш муддати ортга сурилди.
Баъзи тоифадаги IT-мутахассислар, ахборот ва алоқа соҳасида тизимни юзага келтирувчи корхоналар ходимлари, шунингдек, тўлов тизими ва молия бозори барқарорлигини таъминловчи ташкилотларда ишловчилар ҳам сафарбарликдан озод этилди.
Сафарбарлик тадбирлари бошланиши билан Россиянинг бир қатор ҳудудлари маъмуриятлари сафарбарлик кампанияси доирасида йўл қўйилган хатоликлар, шу жумладан, сафарбарликдан озод этилган фуқаролар ҳарбий хизматга чақирилаётгани ҳақида хабарлар берган. Шундан кейин Россия президенти Владимир Путин «барча хатоларни тузатиш ва уларни бошқа такрорламаслик»ни талаб қилди. «Агар хатолик юз берган бўлса, уни тузатиш керак, тегишли асослар бўлмаган ҳолда чақирилганлар уйга қайтарилсин», — деди у.
Шундан кейин бир қатор ҳудудларда ҳарбий комиссариатлар қошида сафарбарлик чоғидаги хатоликлар ҳақида мурожаатларни қабул қилувчи махсус ишчи гуруҳлар тузилди. Шунингдек, бундай мурожаатларни Умумроссия халқ фронтининг минтақавий бўлинмаларига ҳам бериш мумкин.
Изоҳ (0)