Rossiyaning Arxangelsk viloyatidagi “Plesetsk” kosmodromidan ikkita harbiy sun’iy yo‘ldosh ortilgan “Soyuz-2.1v” yengil tashuvchi raketasi uchirildi, deya xabar bermoqda “Interfaks” Rossiya Mudofaa vazirligiga tayanib.
Kosmik qurilmalarga “Kosmos-2561” va “Kosmos-2562” tartib raqamlari berilgan.
Avvalroq, 15-oktabr kuni “Plesetsk” kosmodromidan “Angara-1.2” yengil raketasi parvoz qilgan, o‘shanda kosmik qurilmaga “Kosmos-2560” tartib raqami berilgandi.
Keyinroq Mudofaa vazirligi gap harbiy sun’iy yo‘ldosh haqida borayotganini ma’lum qildi, u muvaffaqiyatli tarzda orbitaga chiqarildi. Qurilma bilan aloqa o‘rnatildi, uning bort tizimlari to‘g‘ri rejimda ishlayotgani xabar qilindi.
Ertasi kuni esa “Kosmos-2560” harbiy sun’iy yo‘ldoshi Rossiyaning Fazo makonini nazorat qilish tizimi kosmik obyektlari bosh katalogiga kiritildi.
Rossiya Mudofaa vazirligi “Plesetsk” kosmodromidan harbiy maqsadlarda kosmik qurilmalar ortilgan raketalarni muntazam ravishda uchiradi. So‘nggi parvozlardan biri aprel oxirida amalga oshirilgan, o‘shanda ham koinotga “Angara-1.2” yuborilgan edi.
Avgustda kosmodromdan “Soyuz-2.1v” tashuvchi raketasi uchib ketgan, unga harbiy sun’iy yo‘ldosh ortilgan edi.
Avvalroq Buyuk Britaniya mudofaa shtabi boshlig‘i Entoni Radakin Rossiya kosmik texnologiyalar yordamida G‘arb mamlakatlariga qarshi harbiy harakatlar olib borishi mumkinligini aytgandi.
Shu yilning iyun oyida Rossiyaning Ukrainadagi jangovar harakatlari fonida “Roskosmos” rahbari Dmitriy Rogozin butun kosmik qurilmalar resursi Mudofaa vazirligi manfaatlariga jalb etilganini ma’lum qilgandi. Orbitada 160 dan ortiq harbiy va fuqarolik sun’iy yo‘ldoshlari bor, degan edi u.
Undan avvalroq Rossiya Ukrainadagi harbiy harakatlarni kuzatib borish uchun mingta sun’iy yo‘ldoshni ishga tushirishi ma’lum qilingandi.
Izoh (0)