AQSH 80 yil ichida birinchi marta Yevropaga 4,7 ming harbiydan iborat “Baqiroq burgutlar” diviziyasini joylashtirdi, ular harbiy mashg‘ulotlarda qatnashadi. Bu haqda CBS News xabar bermoqda.
Diviziya qo‘mondoni aytishicha, nizo kuchaygan yoki NATOga hujum bo‘lgan taqdirda, u Ukraina hududiga kirishga tayyor turadi.
101-havo-desant diviziyasi — 4,7 ming harbiydan iborat yengil piyodalar guruhi bo‘lib, u Ruminiya hududiga joylashtirilgan. CBS News uni elita diviziyalaridan biri deb atamoqda.
“Biz NATO yerlarining har bir dyuyimini himoya qilishga tayyormiz… Biz yengil piyodalar guruhimiz, lekin bu harakatchanlikni aviatsiya va havo hujumlari uchun ham qo‘llay olamiz”, — dedi diviziya qo‘mondoni o‘rinbosari Jon Lyubas.
Oq uy AQSH harbiylari Ukrainadagi nizoda qatnashmasligiga ko‘p marta ishontirgan edi.
Avgust o‘rtalarida Amerikaning NATOdagi vakilligi AQSH armiyasining 101-havo-desant diviziyasi alyansning sharqiy qanoti himoyasini kuchaytirish uchun Yevropaga joylashtirilishini aytgandi.
NATO mamlakatlari yetakchilari 29-iyun kuni Madriddagi sammitda alyansning tezkor javob kuchlari sonini qariyb 8 barobar oshirib, 300 ming kishiga yetkazish haqida kelishib olgandi.
Alyans bosh kotibi Yens Stoltenberg qo‘shinlar ko‘payishi 2023-yilda amalga oshishini ma’lum qildi. Uning aniqlik kiritishicha, alyans mamlakatlari sharqda muayyan hududlarni mudofaa qilish uchun ushbu kuchlarni tayyorlaydi va moliyalashtiradi. NATO Rossiya bilan chegaraga og‘ir texnika va qurol-yarog‘ joylashtirishni rejalashtirmoqda.
“Baqiroq burgutlar”
AQSH armiyasining “Baqiroq burgutlar” 101-havo-desant diviziyasi Ikkinchi jahon urushida G‘arbiy Yevropadagi harbiy harakatlarda qatnashgan. Normandiyaga desant tushirishda, “Market Garden” operatsiyasida ishtirok etgan.1965-yilda 101-diviziya brigadasi Vyetnam urushida, 2003-yilda esa Iroqqa bostirib kirishda qatnashgan.
Izoh (0)